يا فريح عيني قازيه عـن منامـه=ودموعها من فوق الأوجان سايلـه
قالوا علامك قلت مدري علامـي= هموم على قلبي عراضٍ وطايلـه
يالله يا والـي علـى كـل والـي= ياللـي علينـا ناشيـات مخايلـه
يارب يـا معبـود ياقايـد الخيـر=يا مقسم أرزاق الملا من فضايلـه
تسمع دبيب النمل في ليلة الدجـى=وتعلم خفي العبـد عدلـه ومايلـه
تعود لديار المحل عقـب موتهـا=عقب المحل تمطر وتخضر مسايله
ما قصدي الدنيا كفـى الله شرهـا=صيور ما الدنيا عن العبـد زايلـه
أجلي ورزقي بحكمة اللي خلقنـي=بحكمة ولي ما حصينـا فضايلـه
رزق الفتى يكتب بعالـي جبينـه=وما دبر الباري على العبـد نايلـه
أشوف براق على هجعـة المـلا=عينـي تراعيلـه وقلبـي يخايلـه
تمطر على ديار اللي بهم لي وناسه=لا جيتهم همومي عن القلب زايلـه
أولاد صقر هم هل الطيب والنـدى=ريف القصير ليا تـردن رحايلـه
وا لفتهم ولف على الطيب والنقـا=وأدرى عن المنقود وأدرى فشايله
خمسة عشر عام وأنا بزود شيمـة=وادناهم اللي طب بطنـي جمايلـه
قصيرهـم دايـم بعـز ومـعـزه=وبراس عيطا عن سمـوم وقايلـه
ولولاي اخاف يقـال هـذا يـدور=ويشحذ بقيله يـوم ولـف مثايلـه
لا زورهم وأشوفهـم كـل حينـي=ويدله لهم قلبـي وتبـرى غلايلـه
تفرقوا يتلون هوى شمّـخ الـذرى=ويروون هتاش الخلا من مسايلـه
الله يجمعهم علـى العـز والبقـا=ولا يفرح المبغض عليهـم بعايلـه
أوصف الأجواد وأعـد مـا بهـم=وقبلي المهادي ماضيـات مثايلـه
الأجواد مثل الزمل للشيل ترتكـي=وتصبر على كود الحمول وثقايلـه
والأنذال مثل الرس لو زاد سيلـه=لا كثـرة وروده تـردت ثمايلـه
أقول قول ولانـي بالقيـل باحـل=والقول يكفي عن كثيـره صمايلـه
تمت بذكر الله وصلوا على النبـي=اللي سعى بالدين واضهر دلايلـه