يامبارك لي ثمان سنين كامي = لين صبر الروح بين لي فشلها
ياوسيع العرف ياريف الحشامي = طالت الأيام والنفس بزعلها
لأجل من لأهتم في سر إهتمامي = لو يهمه هم قلبي ما دبلها
مإخترعت القول من مصدر إيهامي = أعرف جنيه الذهب وأعرف هللها
كل ماطبيت سوقٍ للكرامي = ينشد النشاد عن غادي هملها
أتصبر وأتعبر لو كلامي = مايبيح أسرار صندوقي كفلها
أدرج الأنظار في شرق وشامي = وأتحطم غيض والنفس بخجلها
يأبو ناصر لو فقدت أحلى منامي = عادتي ماطاي مايضرب زللها
إن شكيت شكايتي قل إحترامي = وإن سكت يزود من ناسي عذلها
من سنينٍ مرمسه عامٍ وعامي = صرمت ريضان قلبي من إمحلها
هي مصائب هي ذنوب أو وش علامي = سد نون العين من بيده كحلها
ماعلى عاتقين الذات أثامي = لو جروح الروح غفرت من نفلها
كم نصبت رشاي من فوق المقامي = عل ماء لزاي يسقي لي بعلها
شجرة الزيتون ماتبرض إشمامي = والغصون العوج وش لون نعدلها
طالت الأيام مانلت المرامي = والمرام غصون تجمع مع سبلها
إن نظرت إبعيد لحقت الملامي = نفس من نفس كد عدى جهلها
وإن كسرت النفس والمقصود سامي = صار رخص النفس في مبدأ عملها
صرت بين النفس والدنيا حطامي = من عرف غاياتها سهل إوسلها
والمصيبه يأبو ناصر بالسنامي = والسنام يقال هو طايب جملها
من بذر له بذر من زين الطعامي = بالمحاضا والمعاضا مإتكلها
يحصد البذار جزلاتٍ جسامي = في عيون الغير وبكبده عسلها
تم قولي وأنت شاعر ما تهامي = صافي القيفان تفكيرك نهلها
والتحيه بآخره مسك الختامي = والمثايل يمنا بالرد أحلها

مرحبا حييت يالحر القطامي = مرحبا برسالتك واللي حملها
مرحبا عداد من صلى وصامي = من ضميرٍ قالها ما ينتحلها
يابعد من رد شوره للمدامي = ماشيٍ بأشوارها يدرأ زعلها
مايميز بالحلال ولا الحرامي = سكة الشيطان ماشٍ في وحلها
ماعرف حق الخوال ولا العمامي = خايبٍ كل المراجل ماشبلها
لو ضحك بالسن تلقى القلب دامي = وعلته بأقصاء الضماير مدخلها
يا عبيد أشوف بالناس إنقسامي = ناس واجد ما أحدٍ يعرف عللها
لا تسمع للمساكين النمامي = هرجة النمام من مبداك زلها
يا عبيد الناس ماتخل النيامي = لا إنتهت قصه لو قصه بدلها
لا تغرك بالرياجيل الأسامي = البطاقه واحده كلٍ حملها
فرقهم مثل النهار مع الظلامي = والمعان الساميه ترجع لأهلها
رافق اللي له عزوم ولا يهامي = يا عبيد إن طعتني وإترك سفلها
وكان تشكي يا عبيد من الغرامي = لا تخفي قصتك يا عبيد قلها
و لا تلام بحب من تزهى الوشامي = يا عبيد إن كان صادتكم حبلها
سنة الأول في هوى شبه الآدامي = حبهن يا عبيد كم نفسٍ قتلها
من الهوى كم واحدٍ مكواه حامي = منه ملوكٍ كبت العرش ودولها
إعذرت بعروشها وفخم المقامي = حيث فرقا من هوت ماتحتملها
لا تهاون بالسبب شد الحزامي = والتعب مخلوف كان الله عقلها
وإعتبرني مستعد بشيل زامي = لا تحسب شروطهم يا عبيد شلها
هد طيرك لا طلع وإرم السهامي = كان قفر دياركم محدٍ نزلها
وكان طيرك بالسماء يا عبيد حامي = وصار طلعه عند صيادٍ ختلها
إنسحب وقضب رشاك من المقامي = وكل نفس برزقها ربي كفلها
والختام أزكى تحيه مع سلامي = لصاحبٍ برسالته يطلب بدلها

الفريدي

صح الله بدنك ولسانك


مع تقديري لك وعذراً وفاك أجمل وأشمل