أهلاً هلا لو خاطري فيه مـــافيه=من مسألة شيخٍ عذابي عزاويه
يا همّـكم يا غمّـكم من معانيه=وفوق الكواكب يا علمنا السعودي

يا سلام الله سلامٍ بالجميع=كل ما هبّـت ذعاذيع الشمال
لا سمعها عاصي السنه يطيع=ويتماثل كل ما قالوا مقال

حياك ربي والخواطر سليمات=واليا تعزوى الشيخ قدرٍ ومهمات
الناس رجليّه وبظهور ريمات=وفوق الكواكب ياعلمنا السعودي

مرحبا ياصاحبي صدري وسيع=وبالمعاني نعرف حقوق الرجال
البدايه جبتها قولٍ بديع=مير لاتخلط حرامك بالحلال

يا حي حي اللي علومه سليمه=ودايم عليهم يركب شداد ريمه
الحق حق ومجرياته ظليمه=وفوق الكواكب يا علمنا السعودي

قلت قولي واحتروا قول اللكيع=مثل ابن جضعان لا جاله مجال
واحترم قول المعنــّـى لايضيع=دام معناكم يطيع الاحتمال

والله حشيمٍ ياسلايل طليحان=لكن شبابٍ قلتم نحد شيبان
ولا غرك الا المفتري ولْد جضعان=وفوق الكواكب ياعلمنا السعودي

اللكيع اللي مسك خطٍّ سريع=راح عمره بالحسد والاحتيال
لا بغينا نشتري قربه يبيع=لاتحطه يارفيقي راس مال

دامم البقا يـاهل القلوب النظيفه=اللي عليها فوق الامتان ضـِيـفـه
وهمّ الخفير المستلم من عريفه=وفوق الكواكب يا علمنا السعودي

المعاني يا خلف ســمّ الربيع=والمبادي كلها تقرير حال
والضعيف ليا خذوا حقــّـه يطيع=واعتراف المجتمع نص إحتلال

سلمت يانواف ردك عرفناه=وزودٍ على عرفه ترانا قبلناه
واللي يقوم بواجبه كم شكرناه=وفوق الكواكب ياعلمنا السعودي

،،،،،،،،،،،،،

من ظهر في صورة الحمل الوديع=لاتحطه بين راسك والعقال
والربيع اليعربي كم له صريع=وللسموم القاتله نلقى مصال

الواجب المعروف كل يجيده=ولاهان عرف مقدّرين الحديده
وأنا عضيدك يالرموع البعيده=وفوق الثريا يا علمنا السعودي

قرر الواقع هل القدر الرفيع=والشقاوي دنيته روح وتعال
في رجا اللي لا غلط سدّه منيع=والرجا كله على شان الريال

من هامته من فوق ذيك النجومي=مايصيده الشيهان لو هو يحومي
ولون الحديده من حصيل القرومي=ورفرف بعزك ياعلمنا السعودي

من رضي بالهينه ماله شفيع=وعن سموم القيظ يغنيك الظلال
والغلط مردود والراعي سميع=والبشر مابين عيش وبين مال

بعض العرب اسم الكواكب يشيله=بيني وبينك لا كشخ يا حليله
وبعض العرب تفدى عيونه قبيله=وفوق الكواكب يا علمنا السعودي

ما نعذرب في هل الشان الرفيع=والإجابه جاهزه قبل السؤال
والخبر ياصلك يا القرم الشجيع=والمعاني صدق ما فيها جدال

ما قلت يانواف غير الحقيقه=ومن شك فينا الله يسهل طريقه
وترى الثواني جوف بطن الدقيقه=وفوق المجره ياعلمنا السعودي

ماتدوس رجولنا شوك النقيع=ولا نصلي ظهرنا قبل الزوال
ولاتعودنا على القول الشنيع=والدعاوي كلها قولٍ وقال