القلب يا ابن سمير مابـه مناعـه=حاولت ابصبر يا ابو فايز ومليـت
مليـت لونـي بوسـط الجماعـه=نعمٍ بربعـي عزوتـي لا تعزويـت
قلب الشقى مالي عليـه استطاعـه=بس اتمنى البر لصبحت وامسيـت
ويا ماحلى ممشى حديث الصناعـه=فكس آر لمنـك ركبتـه تهقويـت
صنع الحكيم اللي نجح باختراعـه=وعلى جهاز الكمبيوتر مـا قنيـت
صوت المكينه لاشتغل دق ساعـه=ويفصل اليا منـك دبلتـه وخفيـت
قلت اركبوا يا أهل الكرم والشجاعه=أغراضنا كد شلتها يـوم صليـت
قبل طلوع الشمس يبـدي شعاعـه=والجيب جاهز فاحصٍ ماه والزيـت
وزان القصيد وزان حتى استماعـه=وترتـاح لاسولفـت والا توحيـت
وعلى الكناود تقل ترتيـب إذاعـه=ماقطعوا علـى النشامـا سرابيـت
اهوايتـي واحبهـا مـن قنـاعـه=مرتاح لـو انـي تعبـت وتعنيـت
وبالاخره مانرجـي احـدٍ شفاعـه=ونرجي الذي في قدرته يحيي الميت

أهـلاً وسهـلاً عـد بـث الاذاعـه=وعد الحجيج اللـي يلبـون بالبيـت
برسالـةٍ جتنـي بـفـن وبـراعـه=من الطهيمي طيب الفعـل والصيـت
زبن ضعيـفٍ جـور الايـام لاعـه=علي عبـدالله مابهـا قـول ياليـت
يامنادي ابن سميـر سمـعٍ وطاعـه=انته شريك اللـي بالأبيـات ناديـت
أركب على البـاب الايمـن وساعـه=وأختر من الأصحاب من هو توريـت
كانـه كبيـر السـن قـدر وراعـه=خلك وسط فـي صحبتـك ماترديـت
الجمس دفرنسين ونعـم البضاعـه=تلحق مساريحٍ مشوا عقب ما اضحيت
يعجبك صـدره بالطمـان ورفاعـه=كنك على البنق المسمـى تساويـت
قبل الفجر فجران ما احلى انشلاعـه=والصبح للحد المحـرم تعديـت (1)
بيتـن لبـن نفجـان قـو اندفاعـه=شاعر مخضرم عاصر الحي والميـت
وياماحلـى بالبـر طقـت شراعـه=وجمع الحطب وللبن الأشقر تقهويت
بزحول ربـعٍ كـل ابوهـم جماعـه=رايٍ موفـق يـوم ربعـك تنقـيـت
وكبشٍ من المصلاح راعيـه باعـه=وقـام يتبلـج يـوم للنقـد عديـت
ومعنا اشقرٍ طـلاع سبـق وقطاعـه=لاصرت في راس الطويلـه تعليـت
ثم ساوقت له فـي مطيـر ارتفاعـه=راحت قـوام ولا علـى الله تعليـت
وهذي حلات العمـر قبـل الوداعـه=وقبل اقول اني على فـلان صليـت