|
مساجله بين جزاء بن صالح و خلف بشير عجلان مساجله بينه وبين الشاعر خلف بشير عجلان الرمالي الشمري ويقول في قصيدت يا ركبن صاروخ للقاع ما ناش ****** والجاذبية قو جذبه جذبها مصممه ما حط مدفع ورشاش *********** عليه عنوان السلامة كتبها يلفي على اللي للمسايير بشاش ********* رجل صدوق والمعالي كسبها والمدح لهل الطيب ما راح ببلاش ********* نسل الرجال اللي رفيع نسبها لاياجزاء هيضت قلبي من الجاش ********* بأسباب غرون نيته ما قلبها أوجست أنا في داخل القلب نهاش ****** ومن حر نار بالضماير لهبها كني خلوج يوم صكات الادباش ******** شافت ولدها مقفي مع جلبها على عشير يمه القلب طراش ******* اللي سلب قلبي وروحي نهبها من شاف رمش العين بالعين ما عاش ************** وتقضي عليه ارماشة من هدبها ويا عين حر طالع الجول واهتاش ********** بالكف جزلات الحباري ضربها ويا شبه وضحا مع مغاتير هتاش ********* حايل ثمان سنين ما حد حلبها دلت تهز امتونها تقل هواش *********** صوت لها سراحها وانتخبها ولو هو بزاروق البحر تقطع الطاش ************ تقطع اليا من المدوه ندبها أبو اخدودن كالذهب بيد نقاش *********** هو الدواء للروح وسبت ذهبها الزين ما خانن ولا هو بغشاش ********* ولا كل غلطه من حبيبه حسبها اليا قلت أنا اقبل عقبها قال أنا ماش *********** حده حسود من طوارف عربها =========================== ورد الشاعر جزاء بن صالح الحربي عليه بهذه القصيدة لا باس ياللي من هواء الزين ما عاش ******** ونوم الملا عن نون عينه حربها ويا عاشق مابين غفوات ونعاش ****** من حب عذراء صابته في عطبها وكنه صويب القلب من طلقة الباش ******* حتى سعر قلبه سعاير لهبها من ود عذراء حبه لضامره ناش ****** لينن روحه من ضميره جذبها حيث الهواء يلعب على كل شوباش ******* سيطر على بعض القلوب وزغبها وحب العذارى للمعاليق حشاش **** حش القلوب القاسيات ونهبها ولا لوم قلب من هواء البيض منداش ******** والحب نار تشتعل في حطبها حيث إن قلبي قبلكم مقرش اقراش ********** اقراش دلون مجزله من كربها وقلبي صخيفن من هواء البيض واهشاش ********* وشيب بقلبي والنواصي شهبها سبايب اللي كن بعيونها حشاش ********* سود محاجرها وعكشن هدبها وزرع بقلبي لكن الزرع ما عاش *********** ويوم أثمرت بوسط قلبي زربها وانته وأنا من عرض محرم ومعتاش ********* ومع درب ناس حبها ماذربها وترى الوضيحي قبلنا بالهوى طاش ******** يالين إن حب البيض روحه رعبها عود وجسمه صاير فيه هشهاش ******** وقالوا تحج وقال مالله كتبها ولانت الوحيد اللي تعرض للابلاش ****** قبلك رجال ما تنطح أسربها قبلك مرويت النمش دون الادباش *********** اللي يهدون القوى من صعبها ربع مضارب شلفهم تسطح الجاش ******* بمصقلات والغضب من طربها وان كان نطاح السبايا لها لهم هاش ******* يردون كانن العجاج ارتكبها اللي لهم بالحب مسرى ومغباش ******* وقلوبهم حب العذارى سلبها ويوم الهوى مقبول وابيض من الشاش ******** وكلن حضيض بعشقته وان كسبها والحب من بين العرب مابه أغشاش ********** ولا فيه شكه بينهم وان خطبها لاشك حب اليوم رخيص وابلاش ************ والناس صدت عن مجاذب حسبها والنجر بدل عن وقاره بمهباش ************** يوم اختلط صلب الحديد وخشبها واليوم بعض الناس بالحب طواش ********* ولاينعرف شتفانها من عضبها وتبدلت بعض المواكر بخشاش ******** ولاينعرف عقبانها من حقبها وبعض العذارى يا خلف حبها ماش ******* وبلشه وتبلشك العجوز بذهبها وتقول صايبها على شوفك اخراش ******* مثل العسيف اللي تقلد كتبها وانا ما عم البيض في كل منواش ********* ولا اذم شجرة واكلن من عنبها وكم خفرتن من حبها دمعها غاش ********* وتبكي وابوها بالعصا كد ضربها وكم واحدن وده عن البيض ينحاش ********* من خوف نار الحب يجري سببها هذا وانا وشلون افتش اتفتاش ********* ليا صار ما بينت لي عن عربها ومن جاء بلا معزوم يقعد بلا فراش ********** وبعض الامور الغامضه ما اغتصبها لاشك انا بنصحك كان انت عطاش ********** ازبن على فكاك عقدت نشبها ازبن على اللي للمواجيب حواش ************* من شان يسعى في مساعي طلبها طلال ابن غضبان فولاذ الانماش ********** وخيال شقحن ما تلاها جنبها مسقي العدا سم الافاعي والاحناش ************* وينطح اوجيهن وان تزايد غضبها وريث عودن ماخذا الفعل ببلاش ************* من روس ربعن عزها من نجبها ليا صاح صياح السبايا بالارباش *********** كم مهرتن خيالها كد عقبها راعي عزومن منثنت يوم الاهواش *********** وياما على حياض المنايا غصبها وهذا اقتراحي جعل يفداكم اللاش ********** يابن الرجال اللي عزيزن نسبها |
رد: مساجله بين جزاء بن صالح و خلف بشير عجلان اخوى ذعذاع الشمال صحت الالسن شعار كبار وسلم قلمك على النقل والنشر تحيتي |
رد: مساجله بين جزاء بن صالح و خلف بشير عجلان صح لسان الشاعرين ابيات جزلة من الشاعرالكبير جزاء صالح شكرا لجمال انتقائك ابا عبدالله تقبل وافر التقدير |
رد: مساجله بين جزاء بن صالح و خلف بشير عجلان صح السانك على الاضافه الجميله وصح السان الشعراااااااااااء |
رد: مساجله بين جزاء بن صالح و خلف بشير عجلان اللهم أغفرلهم ولوالديهم واوالد والديهم ويسرلهم أمورهم وأختم بالصالحات أعمالهم وأجعلهم ممن ذكر فشكرة وتاب فأستغفر 0 (صح السانك على الاضافه الجميله !!! وصح السان الشعراااااااااااء) |
| الساعة الآن 01:58 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO TranZ By
Almuhajir