تحرك ي هاجوسي واشغل أفكاري وهات وهاك=تنقا من بنات الفكر وأنا باتـنقابك
مدام إن القصيد بصدري أوحيله وحي وحراك=تبي تلقابه المعنى وانا الجزلات بألقابك
بعد طول السنين اللي بها صبحك قبل مساك=تطاولك الهموم ولا تغداها تعشابك
تضايقني واجاحدها ولا تخفاني وتخفاك=مقفل دونها دولاب صدري قبل دولابك
ولاكن دامها حانت تهيا أبآمرك وأنهاك=وأنا خابرك ياشعري تهقوي من تهقوابك
أبو مهره تهيض وأودع بصدري مية دكاك=سقاك الله يادارٍ سقاها دم شيابك
ولا تنلام بأفكارك ولا يلام من جاراك=يابيت العز والشيمة زمانك ويش سوابك
سقيمة سلعة الدنيا ولو دارت بها الأفلاك=ياكيف الناس تسعد بك ياكيف الناس ترضابك
ألا ياباغي الدنيا نبيك ويش به وصاك= قبل نفسك تلوم ولا يفيدك كثرة اعتابك
فلو دامت لأحد غيرك لكان الدور ما قد جاك=ولو دام السعد فيها لابد الحزن ينتابك
تفكر وحمد المولى على انه بالحياه أبقاك=وقدم خير تلقى خير ماقدمت بكتابك
تذكر واذكر الأخرى عساها تنفعك ذكراك=فلا بده يطق الباب ولو هبت انت ما هابك
تقلبّك سنينك بين ذا مبغض وذاك أغلاك=وذا لو ماتواحابه توحا فيك وأغتابك
تجي لك عكس ما تبغى ونوبٍ حايزه لرضاك=ونوب يضيق بك من ضيقتك جوك من أسبابك
ألا ما أقشرك يا دنيا يغطيك الخفا بغثاك=ألا بالحيل يا مصعب نهار مفارق أحبابك
تنسيك الرضى وتصير منها أدناة ما بكاك=إليا منه تحرك هاجسك في فقد من جابك
ليالينا تنسينا ولا كن لا حشا ما أنساك=ولو طالت بنا الدنيا ما يمحى ذكرك غيابك
إليا مريتها الديرة وشافت عيني مصلاك=تشقى فكري الشاقي بشوقي لك وأشقابك
واتيه بعالم أفكاري وأعيش بخافقي وياك=وأحس بلوعة الفرقا نهار ان القدر صابك
ألا يا ليت هاك الوقت لي قدره وأكون فداك=حرام اني لأقدمها فداء روحك فداء ترابك
ولكن يا لله إني طالبك يالله بأعز أسماك=ياخلاق الخلايق ما خلا ولخاب طلابك
بعفوك تدخله عال الجنان الخضر في رحماك=بدار ابرار مع منهو رجا عفوك عن إعقابك