تعبت اعلم بالبشر مامن مجيب = ومستغرباً وشلون مايفهمولي
واثق بنفسي دون شكاً ولاريب= ماهمني لو هالبشر ماسمعولي
صراحتي ميزه ولاضنتي عيب= شيئاً بقوله وأسمع اليوم قولي
وافيتهم من دون لاأدري عن الغيب= وبانت بوادرهم لو ماحكولي
ردوا علي يافلان مافعلك مصيب= خبرك قديم وفات وقت المثولي
ولَّى زمان الطيب ياراعي الطيب = وأقبل زمان المصلحه والخبولي
محشوم محشوم ياخوي المواجيب = تكرم ويكرم واضحين الفعولي
بالمختصر كل القيم والمحاسيب = بالتجربه زالت وصارت هزولي
هذا ترى شفته من ابعيد وقريب = وحبيت اوثق هرجتي لاتزولي

يامرحبا بالقاف من واحداً ذيب = رجلاً وللعليا يدينه تطولي
معزته خلف الضلوع المحاديب =وغلاوته بالعين ماله نزولي
ياوقتنا اللي صار كله عواقيب = ومتغيراً في كل وقتاً وحولي
بانت لنا فيك العجب والعذاريب = مع قلبتك تقلب جميع الوصولي
فيك الرحم مقطوع ولايستر العيب= وإلاَّ موازينك بلاها الميولي
ياما صعدت وجيت بإعلى المراقيب= ويامامشيت الين أدمت رجولي
الوقت قاسي والليالي مشاهيب =حتى الرفاقه كلهم ماصفولي
ياذعار بن شلاح وقتك لواهيب = رمضاك رمضى ماتفيد النعولي
احذر من الضحكه تراها كواذيب = كم واحداً يضحك وقلبه غلولي
وفي دنيتك خاوا الرجال المكاسيب = وأترك ردي النفس رجلاً زعولي
وإن حدك الوقت لبعض الصواحيب = مثلك عرفها تنعرف بالفعولي