ياشريف الجوال ماهو بصافي=ياشين جوالك من العصر شيناه
الياسمعت الصوت جاه اختلافي=تعبت واتعبني عسى القوم تقناه
الياصرت طيب يبو هايف عوافي=اهم شي وباقي العلم نلقاه
لو منت لاقالوا هل القول وافي=ما اشفق على رفقة شريف وشرواه
يابن محمد ما على الناس خافي=لاشك مثلك بالوفا وين ابلقاه
يا حبني لاهل القلوب النضافي=ويابغضني لوجيه الانذال بغضاه
رجلٍ يقول ولا انتهى القول يافي=هذاك حسناته تغطي خطاياه
ورجلٍ يقول ولاش فعلٍ يشافي=لاسقت بالفنجال ودك تعداه
واقبل تحيات الوفاء يالسنافي=واجمل سلامي باول القاف واتلاه

البارحه ومودع الهم غافي=لوقلت له يازيد ماقال لك هاه
من كل ما يامر به الرب طافي=وقت الدوام يقوم والفرض ينساه
وانا تقل لي مشكله مع لحافي=كن العقارب يسكنن بزواياه
ركزت تفكيري على وزن قافي=اخشى الغلط عقبي راع الذوق يلقاه
ودنيت مايقطع بعيد الفيافي=عليه من لو يفقد النجم ماتاه
ما اقدر على وصفه مثل وصف لافي=اللي من الدقّه على الذيب حلاه
يفز فزت بوش قدم الصحافي=يوم انحرف له فاير الدم بحذاه
ليته قبل يقفي به الرتل حافي=يملك من اللي تشفي الغل يمناه
منصاه من بيته حجا للضعافي=ومدهل هل المعروف والعرف والجاه
ياعقب من يثنون عند المقافي=متورث برج على ساس مبناه
يفداك من بابه عليه السوافي=من قلّت الزاير تمسّى رعاياه
ياعلي مع مثلك تراني شفافي=ما صاحب الصاحب على شان مقضاه
وقيت بالاصحاب عبر اكتشافي=سراب قاعٍ يطّرد له بمضماه
واخذت مما قال صقر النصافي=بعد النظر كني عن اللي مضى ساه
عن مدحت الخايب منعني عفافي=وعن شذبت الطيب ترى حضي ادراه
ياعلي والله كان يكفي اعترافي=وجهت نظر عن كل ياعلي ماراه
واخبرك باللي ماعليه اختلافي=حبل الوفاء ما انوي على نقضت عراه
وان كان قولي للحقيقه منافي=الكامل اللي واسع الكون سواه
وترى على الجوال حكمك اجحافي=ياعلي ما كل المناطق مغطاه
البث ماهو عبر الارصاد ضافي=احيانا والله يا علي برج ما القاه
تم الكلام ولابقا مايضافي=الاتحياتي على من توراه