مجالس الفرده - محاوره شعرية

خمسة عشر فنجال لحنيف صبيت= لو ان بطنه قربة قد ملاها

بيت اشهر من نار على علم

ويذكر دائما مع شراهة وكثرة شرب القهوه

وهي في الحقيقة محاوره

بين

حنيف بن سعيدان المطيري

و

ناصر بن ابراهيم العبدالكريم

وهو من اهل حرمه وكان صديقاً حميماً لحنيف المطيري ..

(( مدينة حرمة تقع في الشماليه من منطقة سدير تبعد 180 كيلو عن مدينة الرياض
تتبع محافظة المجمعة . ولا يفصلها عن مدينة المجمعة الا شعيب الكلبي. ))

وكثيراً ماجرت بينهما محاورات ساخنة

و تدخل ضمن إطار المداعبات الاخوية...

وفي يوم من الايام حل حنيف ضيفاً

على

ناصر العبدالكريم..

وبينما هما يتجاذبان أطراف الحديث ويشربان القهوة ..

دخل عليهما بعض أهالي حرمه وسكانها ..

ويزيد الاقبال على شرب القهوة ولا سيما حنيف الضيف الذي لا يزال يشرب القهوة

و يرتشف الفنجال تلو الفنجال وتعد الدله تلو الدله

مما جعل ابن عبدالكريم

يقطع الحديث بهذا البيت الموجه الى حنيف قائلاً :

خمسة عشر فنجال لحنيف صبيت = لو أن بطنه قربة قد ملاها

فرد حنيف :

لاتحسبني من دلالك تقهويت = ماينقه الشراب من كثر ماها

فقال ناصر :

ياحنيف أنا في حمستي ماتدنيت = الدله الصفرا نكثر مناها

فرد حنيف :

وراك ماسويتها يوم سويت = مثل العميم اللي يزين سواها
ناصر ليا مني على البيت سجيت = يرخص حلاله ماحسب مشتراها
وأبن عقيل اللي يهلي ليا جيت = مشرع البيبان للي نصاها

فقال ناصر :

سبيتها يوم أنت للضلع لزيت = ضيافتك ياحنيف هذا جزاها
ودلال ربعك يوم بالزين ماريت = هم ربعنا قبلك طوال(ن) خطاها

فرد حنيف :

مانيتي ذمت هل الجود والصيت = الملعبه حنا نقوم سناها
ياموصي الحرمه على صكة البيت = تقول ماهو فيه وأنته وراها
علم الردى يظهر ولو به تهقويت = علم(ن) وكاد ويشهدون قصراها
ياخيبة أمك يوم قالت تمنيت = ياخيبة أمك ياقطيعة رجاها

هذه المحاوره كانت للشاعرين

ناصر العبدالكريم

و

حنيف المطيري

وهم اصدقاء ولكن جاءت هذه المحاورة المازحه الاخويه