مجالس الفرده

مجالس الفرده (http://www.alfredah.net/forum/)
-   مجلس الشعر الخاص (http://www.alfredah.net/forum/alfredah33/)
-   -   دار اخو مريم (http://www.alfredah.net/forum/threads/alfredah8825/)

خلف الفريد 14-08-08 01:41 AM

دار اخو مريم
 
سعد بن محمد المجينين

علم من اعلام قبيلة حرب العزيزه وعيال راشد الكرام في دولة الكويت الشقيقه ....
رجل الكرم والفزعه والمحبه والحميه والاخلاق الفاضله ...
في عام 1427هـ دعاني للزياره بمناسبة زواج نجليه الغاليين ( ناصر واحمد ) وقد اجبت الدعوه
ولله الحمد بصحبة نخبة من ابناء العم الكرام ، وكانت لي هذه المشاركه :


بسم الذي نزّل تبارك والاحزاب=متنزّهٍ عن كل نفيٍ وتشبيه
اللي منحنا نعمةٍ مالها حساب=دينٍٍ حنيف ومصطفى الخلق هاديه
الـ صاحب الحاجات رازقْ ووهاب=واليا سأل عبده ..يجيبه ويعطيه
اطلبك تساعدني على قول ما صاب=واسألك تسامحني على قول مخطيه
وياراكب اللي حملته خمس ركاب=واليا مسك له خط ماحدٍ يباريه
مادخّل الورشه ولا فيه مضراب=واللي شراه بدفتر الشيك شاريه
فكسٍ جديد ليا عطا الخط ينساب=ومثل القطامي يوم يفرد جناحيه
عليه ربعٍ شوفهم يطرب اطراب=ويدلّهون اللي وليفه .. مخلّيه
تفقّد اغراضه عن النقص كساب=ابو اسامه ريف ربعٍ تخاويه
نبا الكويت اللي تحدّت لغصاب=اللي باهلها ترفع الراس وتتيه
ما استسلمت لمخلب الغدر والناب=يوم العرب مافيهم اللي نطق ليه!!
وهبّ الخليج اللي من الجرح منصاب=حتى انكشف عنها سوادٍ مغطيه
كم ارخصوا من شانها عكف الاشناب=لين اندحر جيش الخيانه وراعيه
جيشٍ مع المطلاع نملٍ بسرداب=والجوّ من فوقه لهيبٍ يصاليه
عقوبةٍ عجّل بها رب الارباب=واليوم بالمطلاع توجد بواقيه
ومن عقبها والموت يفتح له ابواب=من داخل الموصل اليا حد شاطيه
والله يساعدكم على جيرة الداب=لو استكن ايام سمّه يقزّيه
ويادار اخو مريم لنا دار واحباب=قلبي يحبك لجل يسكنك غاليه
ابو محمد لاعدمته ولا غاب=عن ناظري واطلب من الرب يحميه
يومه دعانا مالنا عذر ينجاب=ولو تكثر الاشغال حقه نبديه
من لابةٍ يفخر بها كل نسّاب=وزودٍ عليها حصّل الطيب بيديه
من خلقته ضارٍ على فجّة الباب=ماصك بابه دون ضيفه وعانيه
واليا نخيته جاك ماهو بهياب=يوم الردي يعطيك يابس علابيه
وليا نصاه مدوّر العون طلاب=لو ماهو عنده يتعب النفس تقضيه
من حر قلبه شاب شَعره وهو شاب=ولا يشيّب الا طيّب القلب صافيه
والحفله اللي جمّعت كل الاحباب=عيدٍ يفرّح كل من يجتمع فيه
ليلة وفاء وعرفان من كل الاصحاب=للوافي اللي يفرح اليوم ببنيه
علّه فرح سعدون بعقاب وحجاب=والا فرح يعقوب بيوسف وعينيه
او فرحةٍ لأيوب عقب المرض طاب=والا راع -العوده- بعودة ادباسيه
ونبي نبارك للعريسين يالهاب=احمد وناصر كل واحد نهنيه
وايضاً نحيي بالجماعه والانساب=كلٍ على قدره وحقه نحييه
وصلوا على اللي حطّم اصنام وانصاب=وارسى دعايم دين واحكم مبانيه
المصطفى من دونه سيوف وحراب=ودونه اسودٍ ترخص الروح تفديه
بارواحنا نفداه شبٍّ وشياب=من هجمةٍ للغرب حقدٍ وتشويه
حرية تبنى على خس واكذاب=من الذي يهين الاديان ترفيه ؟؟
والمسأله ماهي اجتهادٍ ولا صاب=ولا هي سطورٍ بالجرايد وتنويه
المسأله بغضٍ قديمٍ بالاصلاب=ودليلنا القرآن وضّح معانيه
ما نقبل الاعذار لو تصدر كتاب=مليار مسلم غلهم من يطفيه
واللي حصل يكشف لنا زيف الاغراب=ودرسٍ لنا اليا غفلنا وتنبيه

************
وسلامتكم

ماجد ذاكر 14-08-08 01:43 AM

رد: دار اخو مريم
 
صـــــــح لسانك وابن مجينين كفو ويستاهل

غازى بن عجاب أبوزوايد 14-08-08 07:42 AM

رد: دار اخو مريم
 
الأسد
صباح الخير
أولاً صح لسانك يالأسد المبدع ثانياً ابو محمد يستاهل حيث إنه كفو وبيض الله وجهه ( ياقل مثله وأنا الغير ماذمه ) والله وسبع أنعام ولاتكفى أبو محمد
ثالثاً هذى وينها كل هالوقت يابو عبدالعزيز حنا نحب نسمع الجزل من مثلك وشرواك يالفريد
تقبل مرورى وتحياتي :confused:

تحياتي للجميع

خلف الفريد 14-08-08 03:12 PM

رد: دار اخو مريم
 

ماجد بن ذاكر
صح بدنك لاهنت
شكرا للمرور
.......................

خلف الفريد 14-08-08 03:17 PM

رد: دار اخو مريم
 
الليث الابيض
ابو فيصل
صح بدنك ياتاج راسي
القصيده يزينها مرور وتعبير امثالك ممن يدركون معانيها ....
والطيب بالطيب يذكر وابو محمد راعي معاريف على الكثير ...........
اشكرك على هذه الكلمات الاخويه الصادقه
لاهنت لاهنت
.................

ناصر بن راكب 17-08-08 02:28 AM

رد: دار اخو مريم
 



أبو عبد العزيز


صح لسانك

ويستاهل المدح راعي الطيب

سعد بن محمد المجينين

وبيض الله وجهك دائماً مشرف لحفلات عيال راشد

خلف الفريد 17-08-08 01:14 PM

رد: دار اخو مريم
 

الفاضل الاخ ناصر بن راكب
صح بدنك وسلمت لاخيك
مرورك اسعدني وزادني غبطة وثقه
اشكرك جزيل الشكر لاهنت
.....................

منصور الوسوس 17-08-08 10:19 PM

رد: دار اخو مريم
 
صح لسان يالفريد ودمت مبدعا
تواجدك وتواصل ابداعك اثرى مجالس الشعر
فجديدك راقي وقديمك رائع
شكرا لك على هذه الاضافة ولا يمدح الرجال
الا اطيبهم
ويستاهل المدح والثناء ابو صالح فهو بحق
من اعلام قبيلة حرب
يعافيك ربي يالفريد ويبارلاك في جهودك

خلف الفريد 17-08-08 10:30 PM

رد: دار اخو مريم
 
الغالي ابو محمد
لاشك ان مشاركة الاخوة والاهل ابناء العم شرف لي شخصياً قبل كل شيء ....
وكثير هم الذين يرفع الراس عند ذكرهم وانت احدهم حفظك الباري .....
تواجدك ومرورك اعتزازي وكلماتك الحبيبه حروف من ذهب اضيفها الى سجل افتخاري ...
اشكرك من الاعماق على هذا الفيض الاخوي
لاهنت
..............

مقبل بن نمران 18-08-08 08:28 AM

رد: دار اخو مريم
 
ابو عبد العزيز

صح لسانك وسلم بنانك

يستاهل ابو محمد

وتستاهل دار اخو مريم


تحيتي

خلف الفريد 20-08-08 02:23 AM

رد: دار اخو مريم
 

ابو ياسر
صح بدنك
وشاكرا لك المرور
لاهنت
..................

علي الجضعان 20-08-08 03:39 AM

رد: دار اخو مريم
 
ابو عبد العزيز: مهما قلت فيك اكون مقصر شاعر مبدع كل يوم تطل

علينا بعقد لؤلؤ جديد يستاهل سعد المجينين بس لي طلب في


زواجي ابي قصيده حلوة سنعه

لاتنسى

عبدالله بن دغش 20-08-08 05:34 AM

رد: دار اخو مريم
 
صح لسانك يا ابن العم


ويستاهل أبو محمد

رياض الود 20-08-08 05:57 PM

رد: دار اخو مريم
 
صح للسانك ابوعبد العزيز على هاالابيات الجزله ويساهل سعد المجينين 00 تقبل مروري ودمت بخير

خلف الفريد 21-08-08 01:14 AM

رد: دار اخو مريم
 

ابو عمر
ههههههههههههههههههههههههه ههههههههههههههههههههههههه هههههههه
على زواجك !!؟؟
اعلم الربع وش قلت لي يوم تفرجني على الدور الثاني الجديد :)
قال زواجي قال !!
اللي يمكن يسويها ابو زوايد :D

على كلٍ اشكر لك مرورك المرح الله لايهينك وتراي مستعد مع القصيده بغرفة النوم بعد .......
لاهنت لاهنت
...........

خلف الفريد 21-08-08 01:16 AM

رد: دار اخو مريم
 

اخوي عبد الله
صح بدنك الله لايهينك
اشكرك على مرورك الكريم
لاهنت
..........................

خلف الفريد 21-08-08 01:18 AM

رد: دار اخو مريم
 

الغالي رياض الود
اسعدني مرورك وابهجني وانار متصفحي
وصح بدنك
لاهنت
....................

ابن ردمان 21-08-08 09:39 PM

رد: دار اخو مريم
 
صح لسانك

لك الشكر والتقدير بيض الله وجهك

ويستاهل المجينين

خلف الفريد 21-08-08 11:40 PM

رد: دار اخو مريم
 

ابن ردمان
صح بدنك يالغالي
وانت وجهك ابيض وفالك الخير
لاهنت
......................

فهد الهديب 26-08-08 01:49 AM

رد: دار اخو مريم
 
صح لسانك أبا عبدالعزيز وهذه القصيده ليست بغريبه من شخص كما شخصكم الكريم
وأبو محمد يستاهل المدح لأنه يستحقه بجداره
وقد كان إلقائك أضاف على القصيده شموخ وجماليات عجيبه خاصه عندما إعتلى التصفيق من جمهور الحضور وأستوقفك التصفيق برهه ورديتها ........ لحظه بحق جميله
مع المعلوميه أن الحضور من شتى القبائل لأن أبومحمد له علاقات كثيره

نبا الكويـت اللـي تحـدّت لغصـاب
اللي باهلهـا ترفـع الـراس وتتيـه
ما استسلمت لمخلب الغـدر والنـاب
يوم العرب مافيهم اللي نطـق ليـه!!
وهبّ الخليج اللي من الجرح منصاب
حتى انكشف عنهـا سـوادٍ مغطيـه
كم ارخصوا من شانها عكف الاشناب
لين اندحر جيـش الخيانـه وراعيـه

خلف الفريد 26-08-08 09:49 PM

رد: دار اخو مريم
 

ابو مشاري
شرف لي هذا المرور يضاف الى شرف كونك احد الحاضرين بتلك المناسبة السعيده ....
جميلة هي الذكريات العزيزه على النفس ، بشخوصها وطقوسها ...
لاعدمتك ولا عدمت هذه الكلمات الاخويه المنسابه من الاعماق
لاهنت لاهنت
...................


الساعة الآن 08:21 PM

Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO TranZ By Almuhajir

Ads Management Version 3.0.1 by Saeed Al-Atwi

لتصفح الموقع بشكل جيد الرجاء استخدام الإصدارات الاخيرة من متصفحات IE, FireFox, Chrome

Security team

vEhdaa 1.1 by NLP ©2009


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52