اطلب المعبود باسمـاه العظيمـه=عالم سـر الليالـي مـع علنهـا
يحمانا في ظلاله عـن جحيمـه=ومن قسى سود الليالي ومن فتنها
ويهدينـا للـدروب المستقيمـه=قبل روح العبد تطلع من سكنها
والهدف من بعد ذكره بالوسيمـه=همني موضوعها ماهـو لحنهـا
شفت بعض الناس به عاده ذميمه=كل صاحب عرف مايرتاح منهـا
لاحضر مجلس تقول انه زعيمه=بالسوالف يطلق لروحه رسنهـا
ويتكلم عن جديـده مـع قديمـه=ويستهيض بجابة ٍ لو ماوزنهـا
قبل لاينشد يعبر مـن صميمـه=كن مرضاة العرب عنده ضمنها
والجواب بلا سوال بـدون قيمـه=السوالف نشـدة ٍ عنهـا ثمنهـا
في تقاليـد الرجاجيـل الفهيمـه=ماتجيب بكلمة ٍ ماسئلـت عنهـا
ناقص ٍ مقدارها لو هـي سليمـه=اللبيب يضيق صدره من جهنهـا
اعتقد لاجـت بلا نشـده عقيمـه=دام ماجا وقتها بالعقـل صنهـا
لو فرضنا وصفها مثل الوليمـه=ما تقدم للرجـال بـلا صحنهـا
وقيل راع المعرفه عقله خصيمه=والعرب تمشي على طيب معدنها
ما اقصد رجال ٍ لهم شيمه وقيمه=كل طيب مـا يطولنـه شطنهـا
لو بداها محنّك افكاره حكيمـه=فاهم وجزل السوالف محتضنهـا
ترتوي من عرفه افكار ٍ محيمـه=لا ورّد قصه مع الشاهـد قرنهـا
كل كلمه من مثـل هـذا غنيمـه=مايجيب علوم ٍ عريان ٍ بدنهـا
للعلوم ٍ الطيبـه عنـده عزيمـه=ومحتفظ بعلوم شيبـان ٍ مكنهـا
الرجال اللي مواقفهـا حشيمـه=للقبيلـه تعتبـر عـز لوطنهـا
البلا اللي شايف ٍ روحه صتيمه=ولا تولا السالفـه قـام يعجنهـا
ظالم ٍ بعض البشر نفسه ظليمـه=ويتمادى بالخطا لاصـار ينهـا
ولو على روحه فتح قول ٍ خريمه=مايتدارك للخطايـا لـو مكنهـا
به عقول ٍ واعيه ماهي سقيمـه=ناس ما تعرْف السلوم وتمتحنها
وقبل لايحرف بهـا راع النميمـه=يمكـن يزود بهـا والا يخبنـهـا
المخالف يعتبرهـا لـه قسيمـه=لايقول فـلان بفـلان يخمنهـا