قامت تدق الفكر دق الهواجيس=وحالي على ماقيل وابري حالي
لو مااذكر الله واتعوذ من ابليس=طقيت من هم الحمول الثقالي
ماهو شقا باللي عيونه نواعيس=ولاضاق من طرد الغنادير بالي
لكن ملبّسني شقا الوقت تلبيس=من كل هم ٍ لين فاحت دلالي
من كثر ماحطيت بالخرج والكيس=ومشيت في دنياي ماني مبالي
جلّسني اليوم اغبر الحظ تجليس=وصرت امعقول وصار حظي عقالي
اخذت بالدنيا تجارب وتدريس=وعرفت معنى الصبر مما جرالي
وخليت فضلات الزمن للواحيس= العالم اللي تقتنع بالتوالي
ومن لايعز النفس عن كل تدنيس=حرام يحسب من حساب الرجالي
ولو ان في هالوقت كل المقاييس=تبدلت لين انهدم كل عالي
الحر صار من الطيور المحابيس=والببغاء يسرح بروس الطوالي
والوقت صار يكرّم الكلب والتيس= والذيب جارت به ظروف الليالي