ابا اذكر الله بمبتدا القاف وابدا = بدع القوافي في عريبين الاجداد
اللي لهم في هامة المجد مجدا= مجد الشجاعة والكرم ساس الامجاد
وحال الرّدي يعلّها دوم تردا= ماهو من اللي لشبّة الصّبح وقّاد
حار القلم والشعر من وين يبدا= وبدا قليل ٍ من كثيرات ٍ اوكاد
حرب ٍ لياشفت القبايل تحدّا= قوم ٍ تمشِّي رايها غصب وعناد
حرب ٍ نواصي خيلها ماتصدا= خيل ٍ ابشرّ حمولها شرّها زاد
وليا اصبحت الهدم بالدم صردا= تدفن قوايمها على ساحة الماد
حرب ٍ حمات اديار وللجار سدا= يقفون في صفة كريمين الاولاد
وارواحهم لروح المخاوي هي ابدا= حرب ٍ وحَدْهم سكتّوا كل نقاد
حرب ٍ جميل افعالهم مايعدا= ربع ٍ تجاوز فعلهم كل الاعداد
وعن العوايد عقبهم مانصدا= يبقى لوقت اليوم ميزه بالاحفاد
ماض ٍ مضى برض الجزيرة وعَدا= فيه الدواهي برضها تجهد اجهاد
وقل المطر في سهلة دوم جردا= حتى شوامخ طلعها صار هجاد
وبسيف منهو بدل الجدب عِدا= وخلا له اشعوب ٍ على الخير وراد
ومن عقب ماهو شرّها مستبدا= صارت بحكم العود للطيب تنقاد
ياشمس صرتي بصالي الصيف بردا= من كف ابومتعب لنا العز ينقاد
وشر الفتن لاشد والوقت شدا= حنا دروع الدين بالروح زهاد
يقول من عشرين عمره تعدا= متمسك ٍ بالدين وبالدرب ماحاد
دام الشريعة عندنا خير مبدا= يبقى الوطن مرفوع والشرع ماباد
والختم صلوا عد ماطاف عبدا= على النبي الشافعي يوم الاشهاد