بديت بذكر معبودي=عظيم المنّ والجودي
وعن النقصان والزودي=الهي يغفر السيّه
والا يالله يالخلاق=تسدّد قول ابن عتاق
وفي ٍ للوفا مشتاق=ولا له غيرها نيه
اشدّ القاف واسمّي=نيابه عن بني عمي
اضم الطيّبه ضمي= ولا لي بالهفاويه
يابو بندر غمرت قلوب=بفيض الحب يالمحبوب
ومن طيبك لبسنا ثوبْ=عليه الوان سحريه
وحروفك كلهن جزلات=معانيهن بعد حلوات
لو اقراهن عشر مرات=ماتطفي لهفة ٍ فيه
يابو بندر كبير احساس=صهرت الحب يابن الناس
قوالب من ذهب والماس=على الاحباب مهديه
وجودك بيننا مكسبْ=وجهدك واضح يحسب
الا ياطيّب المنسب= تستاهل (راع الالفيه)
نبيك تواصل ابداعك=يازورقْ وافرد اشراعك
نسيم ٍ هب ذعذاعك=عيّشنا احلام ورديه
بنات العود وعياله=ركون المنتدى وجاله
يقولون انت موّاله=على طرق الهجينيه
يردون الثنا مدبول=على من بالوفا مجبول
ونشكر لك جميل القول= من الاعماق مثنيه
هلا مليون اخو نوره=ياعزوة عز مشهوره
هلا بالصوت والصوره=هلا بامجاد عمْرويه
هلا بالعزوه الصّلفه=على غيرك بها كلْفه
تليق براعي الشلْفه=هلا بالعزوه الحيه
هلا يانسل الابطالي=عريب الجد والخالي
حرار الماكر العالي=هل العلط اليمانيه
ليوث ٍ من عيال العود=لهم وقت الملاقا شهود
وذكر ٍ بالثنا محمود=يوم ان الوقت في غيّه
وعلي يحتّم انصافي=ابا امدح منجم ٍ صافي
عيال العود الاشرافي=هل الردّات بالهيه
وسلام الله على ربعي=على من طبعهم طبعي
وردنا طيّب النبعي= وصدّرنا هناويه