الله على قول الصحيح يهداني=والله يجملني اذا قلت تعبير
تجملي بي يا جزال المعاني=للشعر وقت وللنوادر مداوير
يوم ان ابو ماجد لحفله دعاني=مالي عذر والشعر ماله معاذير
ومع النشاما طيبين المجاني=حضرت للحفله محبه وتقدير
وانا اتشرف في رفيع المكاني=ومثلي تشرف به رجالٍ مشاهير
الشيخ لافي عند قاصي وداني=مواقفه ماهي خفيه عن الغير
اليا دعاه اللي حداه الزماني=يفز واقف ماحسب للمخاسير
كنه يقول انا فدى من نخاني=والعمر فاني وإشهدي يامقادير
ومن غير جاره والخوي والعواني=في مجلسه تلقى ضيوف ومسايير
طيبه يفوح وريحة الزعفراني=تفوح مع هيل الدلال المباهير
ولضيوفه يقلط كبار الصياني=من فوقها حيلٍ شحمها مزابير
وياهل الوفا مال الوفا وجه ثاني=مادام في جو السماء يكفخ الطير
وابمدح اللي فعلهم ماخفاني=والمدح له من فعلهم خير تبرير
اهل الطراق اليا برك كل واني=ادناهم اللي يفتل الراي ويجير
من طيبهم لو وجه الايام شاني=وقفاتهم مثل السيوف البواتير
ربعي اليا شان الزمان وحداني=بوجيههم عيني تشوف التباشير
وعشرة معاديهم تعوّد ثماني=ان ثار بالميدان عج الطوابير
متكاتفين الراي حب وتفاني=للدين وارض الخير وقيادة الخير
انشد بساتين ارضها والمباني=تلقى حقايق فعلهم دون تزوير
وسر ازدهارك يالطراق بثواني=خلفه فكر ورجال نهضه وتعمير
الله يحقق سعيهم والاماني=ويزيدهم عز ومحبه وتنوير
وشكراً وتقديراً وجل امتناني=لاهل الطراق اهل الوجيه المسافير
والله يبيض وجه شيخٍ دعاني=اتاح فرصة هاجسي لتعابير
مشاعر وفيها تحدث لساني=والعذر منكم ان حصل فيه تقصير