عديت في روس الطوال المشاريف=روس الطوال العاليات المطلـــــــــــه
في راس رجمٍ مدهلن للشواحيـــف=فروخ الحرار وكورهن حدر ظلــــــــــه
وتسابقت عبرات عيني ذواريــــــف=ومن لامني جعل السنين تحبلـــــــه
من هاجسٍ بين الضلوع المهاديف=سيطر على القلب الشقي وإستحله
ولع بكبدي ولعة النار بالليـــــــــــف=وأمر الولي ياجب علي أمتثلـــــــــــه
بكيت شيخٍ مايحسب المصاريـــف=الله خلق فيه المكارم اجبلـــــــــــــــه
هداج تيما مابريّه شحاتيـــــــــــف=مثل المطر من مزنةٍ مستــــــــهلــه
بين المضيف وبين محتاج وضعيـف=وقف على باب الصخا العمر كـلـــه
يبكى على جازي من السيف للسيف=وقصايد تنشر بصحف ومجلــــــه
محدٍ سمع في قو باسه ولاشيـــــــف=وصل اللذي بعض العرب ماوصله
وحقق مراده عقب جهد وتكاليـــــــــف=ليت السنين المقبلات أمهللـــــه
شدت رحاله يوم جت له على الكيف=وكل الظروف القاسيات إخضعلــه
مال البشر في حكم الاقدار تصريف=ليت العفون ومالهم فدوة لـــــــــه
اللي بروحتهم عن الارض تخفيـــــــف=وجودهم فوق البسيطه مذلـــه
عسى العوض في راس نواف ومنيف=ونايف وسيع المعرفه وإخوة له
مجربين ويحتمون المواقيـــــــــــــــــف=عيال جازي دلهم مثل دلـــــه
قلت الصحيح ولا منقص ولا أضيــــــف=وكلٍ فعوله بالحياه إشهدلــــه