ياصاح عن بعض السوالف وقفنا=والا المثل يصغي على كل طاروق
والله ماأقول ولو يقال أختلفنا=ماأحط بالحربي وأنا حربي فلوق
مافيه مايوجب سوالف سلفنا=لاأنهد سور ولا لنا شيء مسروق
اللي مضى لكنوزنا ماصرفنا =ولافيه مايوجب عزاوي هل النوق
مابان رسمن ولو مسويه يفنا=يبقى مثل يطري على كل مخلوق
نصد ماكنا ولا يوم شفنا=طير الشراري لا مواري ولا سبوق
حنا الرجال اللي عزيزن شرفنا=وقفاتنا عدله ونظراتنا فوق
يفهم مدى تقديرنا من عرفنا=ويجهل مدى تأثيرنا ناقص الذوق
عن غيرنا يابعد مركز هدفنا=قمه جبل ماياصله طق ولحوق
عوج السوالف ماتلف بطرفنا=من يوم كنا مالها عندنا سوق
ماهمنا من ذمنا لو وصفنا=باتفه خبر من مصدرن غير ماثوق
ياما تفرشنا الوفاء والتحفنا=اولاد راشد مانصافح هل البوق
اللي تؤرث من سلفنا خلفنا=مركز شرف من كامل العز مرموق
وعليه كل علوم الأبطال ضفنا=ولايختفي نون تكاشف له بروق
من كل زينات المثايل قطفنا=من العلوم الطيبه كل مايلوق
عن طبعنا مع ربعنا مانحرفنا=يصب مع واد الرمه سيل ساحوق
يصحي بنا النايم متى ماانحرفنا=ويطير عن عينه كرى النوم ويفوق
نسكت حياء باعذار مالله كلفنا=متجاهلين ردت الصاع مطبوق
نخشى متى ماللبنايه نسفنا=نركب خطأ وندان من حرب بحقوق
ويصيبنا حتى العمى لو حذفنا =ويبقى ذرانا قدم الأجناب مفتوق
وليا حصل ما لانبي بعد أسفنا=أسرار رحلات الفضاء وسط صندوق