اشوف حال الناس مأمن جدايد=الوضع مثل العام واللي ورى العام
هرج القفى بين المخاليق سايد=لوكان ماهو من تعاليم الأسلام
تولد على الفطرة جميع الولايد=مثل الحجيج اللي تلبي بالإحرام
ويلقى بكنف الوالدين الفوايد=والمجتمع يثر عليهم والإعلام
يصير قايد كان مجناه قايد=وكانه قزم يمشي على نهج الأقزام
واحيان عن مجناه ناقص وزايد=يا ما اعتلى في قمة المجد الأيتام
صاروا تلاميذ المحن والشدايد=وداسوا عراقيل الزمن تحت الأقدام
ماينفع الرجال عيش الرغايد=لاصار ماهو للمواجيب مقدام
من يسهج المشروه ماله نقايد=لوحط بالمجلس مقهوي وخدام
وش عاد لو جابوه وسط الجرايد=مايرفع الهلباد تمجيد الأقلام
تكشف لك الايام والزيف بايد=شتان مابين الحقيقة والاوهام
ولا اقول انا عن باقي الناس نايد=امشي على منهج تقاليد وأحكام
حنا على السنه طبوع وعقايد=نحق حق وننصر الحق لا انضام
لأكن عن الدرب المتوه نحايد=قبل نعض من الندم راس الإبهام
وإلا القصايد لو بغيت القصايد=اسوقها قدام بعنان وخطام

نايف بن مياس

فيها ابداع شعري
تحية طيبة لك