يامحمد الاطرش على الراس والعين=واجبك مالي دون واجبك معذار
كلمة فريدي حطها بين قوسين=ومن لاعرف ماجوبها خله ايسار
موضوع صالح وولده يعتبر دين=على القبيله كلهم مابه انكار
واجب على اهل المال وايضا هل الدين=واهل الكرم واهل المروه والاخيار
اللي على نيل المثوبه حريصين=يرجون علام النوايا والاسرار
عسى تبرعهم لهم بالموازين=جزاهم الله فيه عتقاً من النار
بالمانيا صالح له شهور هالحين=في حاجة الفزعه بعد صار ماصار
ابنه من الاسقام ذاق الامرين=من المرض متجرعاً كاس الامرار
يشكي على الله ثم ينخا الشرفين=ربعه هل الفزعات بالماقف الحار
ياعيال راشد ياكعام المعادين=ياكاسبين الطيبه سر وجهار
فزعاتكم تعرف على العسر واللين=تعرف مكارمكم مع الضيف والجار
والناس دايم في بعضهم غنيين=بعد الذي بامره تصاريف الاقدار
ماتصفي الايام دايم على الزين=ولا احداً محصن مايتعرض للاخطار
من خلقة الدنياء على الزين والشين=حق التعاون بين وافين الاشبار
تكاتفو كما ورد بالصحيحين=والمعطي المانع هو النافع الضار