السر بين اثنين مخفي ومدســوس =أكثر مـن الاثـنـيـن عــده تـفشــا

يا حامد الموضوع حسي وملموس = والرجـل تـجـفـل عند أيـّات وشـا

خابرك ما تحتاج لك علم ودروس = تفهم على الطـاير بـعـيد المـعشـا

لوا عشيري بيننا الحبل مـمـسـوس = ولا من وساطه تعـتني بالمخـشـا

من دونها حالوا حواسيد ونجـوس = وحبل الرجاء دونه من البعد حشا

اسج كني تايه الـرأي مضـروس =والحال من كثر الهـواجيـس نـشـا

حبه لحقني لحق شيهان فاعـوس = لحـق الطيـار وله تعـقـرب ونشـا

لحق الطيار مخالفه والهواء كوس = حـوّل بـهـا ومـن الـثنـادي تعشا

هذا بلايه والحدث يجبر انـفـوس = والذيب سمي ذيـب لـو مـا تـعشـا

الوضع من يمه معقد ومـنـحـوس = عـجّـل علـيّ افـّـزعـتـك لا تـمشـا
(ابوفايز)

اخوى
الجديد أبو فايز
سعدت برسالتك واستمتع بقراءة قصيدتك الرائعه
صح لسانك مليون ولايكفون وننتظر نشر اللي بالدرج
ولاتدرى ماعلى كريمٍ تشرط نبي الجديد والقديم قصيدك
جزل ونحرص عليه لاهنت لاهنت وصح لسانك يالبناخي
تحيتي

حبه لحقني لحق شيهان فاعـوس . لحـق الطيـار وله تعـقـرب ونشـا

الوضع من يمه معقد ومـنـحـوس . عـجـل علـي افـزعـتـك لا تـمشـا


ابوفايز
سلمت ودمت وصح السانك
ومشكور على الاظافه
تحياتي