قم يابو محمد ودنا ناصل الدكتور=احس المشاعر داخلي حرها صالي
حروف المعاني اصبحت غصة بالزور=ابا احاول التعبير عن بعض الاحوالي
انا سايح ٍمسرور ولكن ماني مسرور=ولو العين تسلى بالنظر ماني بسالي
بس ادوج باسطنبول وامشي بها وادور=واخالط جموع الناس وكني بها لحالي
تجاذبني الافكاروكني بدون شعور=احس الزمن والفرق مابين الاجيالي
واشوف المعالم من مساجد وكبر قصور=تقل تشتكي للناس من وضعها الحالي
صروح ٍتعلّت كنها ترمق البسفور=وبحر مرمره من سطوها صابه اجفالي
ولقيت الجواب الواقعي في بقايا السور=و(ايا صوفيا ) تشهد على نصرنا الغالي
هنا مر من فتحاته الفاتح المنصور=وكسب قول (نعم الجيش واميره الوالي)
مؤسس (خلافه ) صار منها يشع النور=تسيّر جيوش الفتح من (بابها العالي)
وتكدّرت من جور السنين العجاف وجور=رجالٍ تنكـّر للوطن ماهي رجالي
مسوخٍ محت لامجاد تاريخها مع دور=سلاطين دين ٍمضرب لكل الامثالي
تنكر لهم مستغربٍ ماهو المجبور=على اهانة ارموز الحضاره والاعمالي
اهان المساجد والجوامع وكل الدور=قلبها متاحف ملغيٍ صوتها العالي
تدوس النصارى فرشها النادر الممهور=عقب كان فوق ارقابها داس (خيّالي)
ولو الغى مظاهر دين .. محفوظة ٍبصدور=ذا عشقٍ قديم ٍعند الاتراك لازالي
بين محمد الفاتح وبين (الخنا )المقبور=فروقٍ كبيره مالها حصر واجمالي
هذا مسلمٍ في صفحة المكرمه مشهور=وهذا (دونميٍّ) هافي الاصل محتالي
فرض نصره الفاشل على شعبه المبهور=وتسمى بـ (ابوهم ) ظلم في لحظة اهبالي
صخرهم بقوة جيشه الملحد المغرور=وعقد صفقته مع نادي الغرب الانذالي
ولكن موار الخير عادت لهم بظهور=بدوا ياردون لمنبع ٍطعمه زلالي
اعاد الاصاله للوطن واحدٍ ممرور=جمع بين حب الدين مع طيب الافعالي
رجب اردوغان الصيرمي فارسٍ مغمور=لكنّ اثبت انه حامل كل الاثقالي
يقول الفخر في دين الاسلام ماهو زور=وصمد في وجوه الغرب والقيل والقالي
وتوجّه لشرقٍ كان من ظلمهم مقهور=وعيونه على الاقصى بها الدمع همالي
تذكًر صلاح الدين يوم العيون العور=تفرّج على عورات غزّه (وتكتالي) !!!