فواز يشفيك الولي خالق الكون=وغير الدعاء المسموع مانستطيعه
انا ادري انك يابن الاجواد محزون=وحنا بعد مثلك رمتنا الفجيعه
قدر الخوي عند المشاكيل مايهون=وشلون لاروّح بلحظه سريعه !!
الآدمي عمره للاقدار مرهون=ومقدّر الاقدار ربٍّ نطيعه
ومصيرنا موتٍ محقق ومضمون=ولا تحول من دونه حصونٍ منيعه
وقليل منهم بالشهاده يفوزون=الا الذي غالي حياته يبيعه
دون الوطن والدين وابليس ملعون=مايعبث اتباعه بدار الشريعه
اللي على درب الخيانات يمشون=ولا يهمهم لو النتايج شنيعه
عصابةٍ مابين غادر ومجنون=والحقد والنكران فيهم طبيعه
ونزفت يافواز والدم له لون=وما صابك الله عادلٍ مايضيعه
انتم تراكم للوطن درع وحصون=ومسيركم على المبادْي الرفيعه
بينت يافواز ماكان مكنون=يانسل شيخٍ دايمٍ بالطليعه
اخوي ابو فايز وانا منه ممنون=عون الرفيق وللمسيّر ربيعه
وصلوا على المختار ياللي تصلون=نبينا اللي له بالاعناق بيعه