من عرفتك صرت انا المظلوم والقاضي قبيل = لابغى ياخذ حلاله جيت لديت سنعه ‍
وصرت عقبك من سماتي لاصحيح ولا قتيل = عودٍ أجرد في عباته والزمن رد إصفعه
وصرت مثل اللي بناله بيت في وسط المسيل = جاه غيثٍ ماتحمل صطوته قام إقشعه
اسقني لا عدمت رضاك شهد وسلسبيل = قبل مالعذال تحصد ماتعبنا نزرعه
ضعت في صحراك خلي لا دليل ولا صميل = كيف قلت إني مسافر لا خليل ولا أمتعه
مأعتبر نفسي ليا مريت بك عابر سبيل = ولا أعتبرها كثر من مات قبلي أمعه
وإن صحيت وشفتني ياصاح باطرافك نزيل = الكرم ياسمي الخير لا أطعمت أشبعه
والله إني مالقيت وشفت لا أوصافك مثيل = انت أروع من عرفت ومن عرفت أنت أروعه
شب نارك جيت لك ملهوف بضلوعي صهيل = مابقى في عين ذهني غير باب وصومعه
خل للراحل المسبي تحت رمشك مقيل = وإن غطاه الشعر شلال بالليل إهجعه
لاتسوق الذود يمي صدرك النافر كفيل = أتركه يرتع صوابي دام صدري مرتعه
من زلال الشفق والغيم مأرضى بالقليل = هل باللي جاك مقبل ومن باعك بعه
من عرفتك صرت انا المقيم بضلوع الرحيل = جاهلٍ بالدرب يمك جاه حظه وجدعه
وصرت أنا المظلوم والقاضي جنابك لي قبيل = وإن بغى ياخذ حلاله قمت هفيت سنعه