عَودٍ على ددسن "وضرب" البواجي=مثل القنابل يوم يرعد رعدها
في حالةٍ رثه كما وجه "لاجي"=وعليه من لوعات بقعا نكدها
شكله حزين ومشيته بادّراجي=كنه يدور حاجةٍ له فقدها
قلت اطلبك ياخال لو به احراجي=مهموم!! .. وانت بدار نجد ورغدها
قال اشتكي للي له العبد راجي=اسمع كلامي !!.. واتحمّل سندها
الشعب مايكفيه غير الدجاجي=ولولا "دجاج الغرب" رحنا بيدها
لاشفت لحم الضان يضحك حجاجي=ومن الغلا.. فرحه تموت بمهدها
حتى "الهروش" اللي لحمها سماجي=صارت شفاقه خل "لحمة" ولدها
وصارت مقاض البيت مثل العلاجي=ومن استطاع لسعرها ما وجدها
ووزارة التجار في "برج عاجي"=حطت "حمايه" مار محدٍ حمدها
وتجارنا تسعيرهم بالمزاجي=ومستهلك ٍ هالك يعاني كبدها
ويشاركون ضعوفنا "بالخراجي"=ويزاحمون احوج فقارى بلدها
قام و اشترى خمسة كراتين "ماجي"=وشوية اغراضٍ قليلٍ عددها
ثم اختفى داخل زحام الحراجي=ذي حالةٍ ..والخافي "امر وادهى"