نا هوايه وشفي صيهد عالي =ومخايل البرق والرعاد بالقبله
ومحير واد من اهل الماشيه خالي=في خايع مزهر متعاقب ربله
من قبل يومين وبل الديم همّالي= في جو من عايشه يفرح ويطرب له
وخوة ارجال لهم بالطيب منزالي= الكل منهم طريق الطيب يتعب له
مافيه هندي ونيبالي وبنغالي =والمزن قاطب وديمه ثابت وبله
من شوفهم بالشوارع ضايق بالي =ولافيهم اللي يناسب لي واناسب له
الكذب والنصب والحيله ورا المالي =شر ومغثه ومنه الكبد مندبله
مجنون دنيا بكل اسلوب يحتالي = ناس ورا القرش واهل القرش منهبله
ودي برفقة حشيم وصاحب غالي= اللي مع الطيب يسعى به وينسب له
يازبن رفقة وصحبة طيب الفالي = اللي يعوضك بغيره يوم تندب له
حرصي على مرافقة ذربين الافعالي= والا الردي القصي ماني با حسب له
هذا تمني عسى المنوه تهيالي = والرجل يسعى ورا مالله كاتب له