سلام يادار النشاما والاحرار=سلام يادار الصمود المنيفه
سلام يادار الشهاده والاطهار=سلام ياقهر الظروف الكليفه
سلام ياكويت المكارم والاخيار=اهل المحبه والقلوب النظيفه
دار الرجال اللي على الضيف والجار=مثالهم حاتم لجاره وضيفه
دارٍ عصت على اسود الوجه غدار=مسخٍ غزا الجيران واستل سيفه
بايق وطبـّل له حواسيد واشرار=قالوا خفايف والكلايف طفيفه
ويوم اوقعوه بغبة الموت والنار=تفرقوا خاسين عن مثل جيفه
ثم انهزم حصيله الخزي والعار=حافي قدم ومساندٍ له رديفه
والخاتمه جحرٍ وفي داخله فار=واهانةٍ منها العروبه كسيفه
وكويتنا دونه مسافات واعمار=باغي ربيعه مالقا غير صيفه
ومن دونه الشيخان وافين الاشبار=آل الصباح اهل العقول الحصيفه
صغير في حجمه كبير بالاصرار=وكثر الكلاب النابحه مايخيفه
مشاعري واقولها سر واجهار=لو انّ جرح القلب وقّـف نزيفه
وسلام من دارٍ ليا صار ما صار=زين الدخيل ليا غدا الوقت شيفه
دار المليك الفيصلي حامي الدار=اللي تربّع فوق وادي حنيفه
ان كشّرت بانيابها حدّ بتار=وان وادعت صارت "رياضه" مريفه
والليله الحفله ينابيع وانهار=مورد وفاء لاهل النفوس الشريفه
بضيافة اللي له محبه ومقدار=ريف الضيوف اللي توارد مضيفه
مسكانهم قلبه على يمين ويسار=قلبٍ نظيف وفيه روح خفيفه
صافي سريره ماجعل دونه اسوار=ودّه حقيقي ماشكوا منه زيفه
شيخ ٍمزايا الطيب عنده لها كار=وفعل الجمايل حطـّها له وظيفه
ابو محمد قيمته صرف دينار=عملة فخر ما هو بعمله ضعيفه
الله يفكه من صواديف الاقدار=وعسى السعاده والسلامه حليفه
نشاركه فرحة زواج ابنه البار=الله يبارك للوليف ووليفه
قدمت له شعري بدل باقة ازهار=هديةٍ من قلب يسمع رفيفه
منصور يابنيْ لك وصيه وتذكار=يوم الوصايا اليوم مثل الطريفه
الطيب فارس والشكالات مضمار=وانته سليل الطيب واطيب خليفه
خلك على دربه ولا تصير محتار=لو كان مِدّك مايعادل نصيفه
وصلوا عدد مالاحت نجوم واقمار=على النبي والآل واهل السقيفه

اخوى الكبير بقدره

خلف بن محمد بن عتاق

يزداد إعجابي بك يوماً تلو الآخر قصيده فارهه جزله بمن يستحق


المدح سعد بن محمد المجينين نعم الرفيق ونعم الخوى ولايهونون ربعنا


بالكويت وكذلك أولاد راشد عيال العود سعد منهم ربعه بالموقف الصعب


تقبل مرورى وتحيتي