عسى الديار اللي شمال عن السيح = تمطر مزونه والمحاجر ملايا
سج القدم ما بين فياض وصحاصيح = بأرض قفر ما دوجتبه رعايا
منبوتها الرقروق مع شجرة الشيح = وشفت القطا مع الحباري سرايا
يرتاح بالي يوم أنط اللحاليح = شوف النفود وافراق نور القرايا
خوة رجالٍ بالمراجل طحاطيح = وشب ناري والدلال الملايا
تجمعهم الخوة على هبة الريح = وسوالف ماظن فيها خطايا
أبعد عن اللي يلعبون المسابيح = شذابه العرقوب بجمع الحكايا
خل الردي علّه على وجه يطيح = يطيح على وجه خبيث السجايا
وفكرت بالمرواح مع هبة الريح = قبل الغروب وقبل شهر الضحايا
قبل الفجر مجهزٍ للمساريح = بين النفود وبين ذيك الحوايا
سمعتلي قناص لطيوره يصيح = يم الشعيب اللي علوه ركايا
وتل السبق جراح وخل الملاويح = حول عليها في فروع الشغايا
ضرب بمخلابه ودمانها تسيح = خل الثنادي بالمخالب فرايا
طلعت سكيني بوسط المفاتيح = واقطع نسور الطير وشلت البقايا
وعودت أنا وجراح مرتاح ومريح = طير الشيوخ مقدمين الهدايا
عطيت دربٍ مع جبال وصلافيح = خطٍ اعرفه فيه كل المزايا
ماياصله ياكود بعيد المشاويح = اللي مع الطرقه يسوق المطايا
تم الجواب اللي كتبته بتسريح = على رسول الحق خير البرايا