من جرب الايام ...

المشاركة الأصلية كتبت بواسطة خلف الفريد

مشاعرٌ معبِّره ..... ونتاج تجربه ..
اهديها لكم احبتي ....

من جرّب الايام شاف التهاويل=وما مرّ غيره من غثاها يمرّه
كم ذايقٍ منها العنا والغرابيل=لو يتكرّب للبلاوي تجرّه
وكم حوّلت من قمة المجد حلحيل=من عقب ما صدر المجالس مقره
ولا توخذ الدنيا اعتباط وتساهيل=من ذاق حاليها تجرّع لـمره
ياما بها على الاجاويد من ميل=واحوالها بين الشقا والمسره
وسود الليالي موهقاتٍ محابيل=خذ الحذر لا ياخذنّك بـغِرّه
لاتسوّي المعروف باردى الرجاجيل=والطّيب لايعوّد عليك بمضره
كم زارعٍ لاصار وقت المحاصيل=مايجني الا مايشيله بـ(صرّه)
من يحسبن الناس روس ومشاكيل=ويغريه منهم قول" لله دره"
وكثير مدح الناس خدعه وتضليل=احدٍ لها حسّاب واحدٍ تغره
كم واحدٍ تكثر عزاويه بالليل= واليا اشرقت شمس الحقيقه.. مَغَرّه
وكم واحدٍ يضرب على الصدر بالحيل=واليا بغيته لو "تقصه بجرّه"
وعندي عن الاصحاب جمله وتفصيل=وابا اختصر خوف الملل والتشره
هذا خوي سَهَره وسَفـْره وتعليل=ويا (حلوها) ما دامها مستمره
وهذا رفيقٍ لايشيِّل ولا يشيل=على الاقل كافيك خيره وشره
وهذا رفيقٍ ترتخي به صواميل=شدّه لو ان الشد نوبٍ يضره
وهذا رفيق ماترك لوية الذيل=خلك وسط ..مابين برده وحره
وهذا خليلٍ بينهم كنه سهيل=اللي مثيله نادرٍ بالمجره
طيبه وراثه ماظهر فيه تمثيل=ولا سَلـَك درب المعالي "تكرّه"
ياقل مثله عند سلّ المصاقيل=يوم "المواقف" بين كـَرّه وفرّه
هذا رفيقي "ريّضوا" ياهل الخيل=السَّعْد والتوفيق مَرّه ومَرّه

ـــــــــــــــــــــــــ ـــــــ
ماشاء الله والله ياخلف اني شديد الاعجاب بهذه الرائعه صح لسانك وعلا شانك
جميله وصادقه معني وقوه

الاسد

اخوى الغالى خلف بن عتاق

وش تبيني أقول ياخلف شهادتى فيك مجروحه لإنك بالقمه


دائماً من غير قصور بعيال العود لكن أنا معجب بشخصك وشعرك

رددتها من إعجابي بها وإستمتعت بقرائتها فلله درك من شاعر علم


تقبل مرورى وتحياتي

حياك الله ابا خالد
شهادة شاعر كبير بحجم علي بن زيد فخر لي بحد ذاته ....
واعجابك دليل القبول وهو مانطلبه ويفرحنا ...
اشكرك على ثقتك باخيك وثنائك العطر
لاعدمتك

اخي وحبيبي رمز الوفاء الشاعر الكبير غازي ابو زوايد
القلوب شواهد ابا فيصل فانت من اعتز بشهادته وتواجده واتعلم منه جميل الشعر ....
كلماتك تاج اضعه على راسي ووسام اعلقه على الصدر ...
صح بدنك ايها الخليل الوفي ....
مرورك ابهج الروح واثلج الصدر
لاعدمتك

هذا خوي سَهَـره وسَفْـره وتعليـل ويا (حلوها) مـا دامهـا مستمـره وهـذا رفيـقٍ لايشيِّـل ولا يشيـل على الاقـل كافيـك خيـره وشـره وهذا رفيقٍ ترتخـي بـه صواميـل شدّه لـو ان الشـد نـوبٍ يضـره وهذا رفيـق ماتـرك لويـة الذيـل خلك وسط ..مابيـن بـرده وحـره وهذا خليـلٍ بينهـم كنـه سهيـل اللـي مثيلـه نــادرٍ بالمـجـره

صح لسانك يابوعبدالعزيز

قصيدة جزلة امتازت بالحكمة ذكرت فيها خمسة انواع من الاخلاء

ومنك ومن امثالك نستفيد وناخذ الحكمة

جزاك الله خير وكثر الله من امثالك

قصيدة قمة وسلم فمه

شاعرنا القدير ابا زياد
صح لسانك .. ولا على مثلك زود يالغالي ...
اشكرك على جميل الثقه واعبق الثناء ..
واحب تذكير اخي
لازلنا بانتظارجديد .. قادح الزناد مبدعنا ابا زياد
لاعدمتك

مهرة الخيال
امام قافزة الحواجز يقف القلم عاجز...
ولكن... لن يعجزنا قول شكراً ...
ولي الشرف ان اجد هذا الثناء المختزل ...
لاعدمتك

تأبى الا ان تبقى بالقمة !!!
هو مكانك الطبيعي !!
امتعتنا ابو عبد العزيز بهذهـ الدرر والحكم ,,

ادعو لك ربي العالي ان يبقيك ذخرا لعيال راشد

ما اقول الا :: صح لسانك (مليار) ,,

الفريد صح السانك قصيده تستاهل الأشاده

تقبل مروري