بسم الله الرحمن الرحيم

السلام عليكم ورحمة الله وبركاته

في يوم 25 / 3 / 1430 هـ دعاني العميد تريحيب بن سابح الحربي مشكور للجلسة الدورية بحكم انه المنسق لها حيث تزهو الجلسة في نخبة من اعيان حرب كان المتحدث فيها , د/ مرزوق بن تنباك , و د/ صالح النافع
,و د/ ماجد عبيد , و رجل الأعمال / عبدالله عليثه والباحث / فايز البدراني وكان لي الشرف الكبير بالمشاركة في هذه الأبيات :

ارسلي تريحيب جزل التراحيب = لجل اجتماع الموانسه للجماعه
ولبيت للمرسال دعواه وأجيب = وأقول ياتريحيب سمعٍ و طاعه
جمعاك تجمع محتمين المواجيب = احسبلها حسبان لو كان ساعه
ليا دعاني داعيٍ قلت ماأغيب = ربعي حجاي وعندهم لي بضاعه
في جلسة يديرها استاذ وأديب = يروي ضميان السوالف ابداعه
بالعلم والتاريخ قوله مكاسيب = اكسب مثل غيري بطيب استماعه
في مجلس فيه ازرق العود والطيب = متصدره من طال عِـرفه وباعه
أفــنــى حــيــاته كــلها بالتجــاريب = وشيبه وقار وبالنواصي شعاعه
من شبته لين اعتلق راسه الشيب = للمرجله والطيب رافع شراعه
منصى لشمطان اللحا والأشانيب = وذكره مع الأجناب بالفعل ذاعه
يالابتي ياستر راسي عن العيب = ياعزوت الحربي كان الوقت لاعه
لاصــار للحـــربــي لزوم ومطاليب = لا تبخلون بجاهكم ياجماعه
بقضى الحوايج يكرمك عالم الغيب = أوصيكم ونفسي بذل الشفاعه
ان كان عند أصحاب ولا معازيب = والرجل يمدح من فعايل ذراعه
وختامها مع ازرق العود والطيب = صلو على محمد نبي الشفاعه

صح لسانك يا طويل العمر والله إنك من أغلى أهل الرياض كلهم
/
صاحب مواقف الرجوله والنخوه
/
اسمك يرفع الراس وذكرك طيب ونوماس
.
مع إني ما قابلتك إلا مرة واحده لكنها عن مقابلة الف رجال لأنها بقيت في ذاكرتي تعلمني روح الفزعه والبشاشه ومزاحمة الرياجيل على العلم الغانم ,,
.
.
القصيده اللي تقولها غاليه عاليه حتى لو كتبتها بدون وزن وقافيه .