يامنتدى ربعي لعلك بالوجود=ويدوم عزك تحت كنف القايمين
ابحث عن اللي فيه خير ومنفعه=حرب التفرق لاتدق اطبولها
حنا ترانا تحت ضباطك جنود=واقولها واطق باذن المشرفين
حكم ضميرك لا تخش المعمعه=والناس خاطبها بقدر اعقولها
لافرق بين اهل القرى واهل النفود=مادامهم تحت الكريم موحدين
وسدير تيتبقى بجنب المجمعه=والدار ماتعمر بغير ازحولها
ماعاد بالدعوى رسوم ولا حدود=كل السوالف مثل ما انتم شايفين
واللي يشوشر علمه لا تقمعه=القامه العليا يماري طولها
والذيب ما يقدر على نطح الاسود=لاكن ماهو هايب من ابا الحصين
والبس بالفاره يحصل مطمعه=ياليت كلِ يفتهم مدلولها
اخذت لي من دورة الدنيا بنود=ان الليالي كل ابوها ليلتين
يبي يجي لك ضيق من بعد السعه=لابد ماتسمع صهيل اخيولها
هذا الكلام اللي على قوله شهود=ويشهد عليه الله خير الشاهدين
ركز على فحواه ياللي تسمعه=وامش بتقاليد العرب واصولها
واللي يبي ينثر من الماسه عقود=نسمع كلام الفاهمين العارفين
اللي يوقع بالهدف ما يرمعه=له بندق ترمي وتجدع جولها
وانا سعوديِ تحت حكم السعود=اهل العداله حاضرين وسابقين
وضحت مقصودي بقيفان اربعه=واعلنتها يالنايمين اصحولها
نايف بن مياس الفريدي

يالله ياللي ماخفتك الخوافي=ياللي فديت بكبش عبدك اسماعيل
عطني على ضني وعزة عفافي=واجعل طريق الخير قدمي تساهيل
ومن بعد ذكرك زان بدع القوافي=وركزت تفكيري لبدع التماثيل
واسنت للي ريف من جاه لافي=هيف السمين اللي يقلط من الحيل
بالموقف الغصاب فعله يشافي=لاقلت الشيمات بين الرياجيل
سلمان لامنه هبى كل هافي=حلال ما يصعب حفيد الحلاحيل
يا مسندي والصيف قفى وطافي=عقب السموم اللافحه برد الليل
غير المولع مايشوف اختلافي=واهل القنص تفرح ليا بين سهيل
لشملت خليت المدينه خلافي=لرضٍ عليها لاح برق المخاييل
ارتاح في جيانها والفيافي=يالله عساها باول الوسم للسيل
ارضٍ بها برق الدواغر تشافي=ولاهي لغير اهل الصقاره مداهيل
وبين المراتب شلت لي حر وافي=افجح قصير الساق ضافي سراويل
منه الحبارى ماتشوف العوافي=يلحق ليا صارت كبر حبة الهيل
وليا وصلها صكها بانحرافي=بالصايدين اللي سوات المصاقيل
ثم اعتلى وانكس لها باحترافي=واجهز عليها وافترس طيب الحيل
واليوم طاب ولا بقى مايضافي=إلا المعشى واجتماع المشاكيل
جمعة وفاء لاهل النفوس الخفافي=والكيف دار وزان جو التعاليل
هذا منى قلبي وهذا شفافي=لو قيل مالك بالصقاره محاصيل
ياللي تذمون الصقاقير كافي=مانتم على ذريتي آدم مكافيل
قد قلتها واعلنتها باعترافي=اهل الولع مايسمعون العواذيل
واسلم وسلم يالرفيق السنافي=لو مانعزك مانصتك المراسيل
نايف بن شليويح بن مياس الفريدي

البارح الفكر مدري وين وداني=في كل وجهه هواجيسه يسجنه
هوجاس يقفي ويقبل واحدٍ ثاني=والقلب خارت عزومه يوم دكنه
والحي هادي وكنه دون سكاني=ماغير نور القمر كنه ولا كنه
وين انت ياللي على لقياه مناني=بين عليه التعجب لاضحك سنه
لمحت رمز المحبه وسط الاعياني=تنبي عيونه عن الخافي ولو كنه
عطشان ضميان مابليت شرياني=وزمول شوقي على وصله لها حنه
لوهي على نهر دجله كان ما ارواني=لو كل حزه يمرنه ويردنه
ماغيره احدٍ هويته والعمر فاني=لاكن عسى الله يعوض العمر بالجنه
نايف بن مياس

لبيه يامسهرت عيني ودارك بعيد=ماعاد عندي تعدي نشرة الاقتصاد
حذفت في نظرت عيونك شبابيك صيد=وشبكت حرٍ مضريه الزمن للهداد
كل ماتنتهي نشرتك ليتك تعيد=ودي امعن بخلق الله وفرق العباد
المؤشر يراوح وانت عندي تزيد=مثل غلا نور عند مشجع الاتحاد
وش جدى من تولع فيك غير النشيد=فيه تخفيف ضيم الوقت والاضطهاد
فيك معنى القصيده وانت بيت القصيد=وانت جبر الكسور وناقد الانتقاد
وانت منبر بتاريخ الجمال المجيد=وانت شهرتك فاقت حاكمين البلاد
واختلاف الروايه شي ماهو جديد=كم سمعنا رواية طارق بن زياد

يا عذاب القلب ياهمه وغمه=يا دمار الحال زلزلتوا ركونه
منك يانور القمر لحظة متمه=القمر يشبهك في شكله ولونه
رونقه جذاب والنيران فمه=مبسمه ذباح والبلوى عيونه
جسمك المبروم سبب لي مطمه=اشهدٍ لله في خلقه شئونه
واشهد انك بالهوى مافيك ذمه=من وقع في حبكم ماترحمونه
سهمك المسموم عم الدم سمه=بانتظار العطف منكم تحتوونه
شفت جرحك لد في جرحك ولمه=الدكاتر من سنين يضمدونه
وانت معك دواه لاكن مانت يمه=بالتعامل ليه ماعندك مرونه
الدواء بيديك ياكيفه وكمه=وانت دكتور الهوى تعرف فنونه
الجبل لو شاف زولك صاح صمه=ليتكم من فوق صخري تنحتونه
حطوا اسمه واكتبوا فتحه وضمه=ضمه التاريخ لو طالت قرونه
سيرة العشاق للعاشق مهمه=قادم الاجيال يمكن يدرسونه
نايف بن مياس الفريدي

يا كبير السن مدري يا صغير=من عرفته ماتغير في صفاته
كم وصل عمره وشكله ماتغير=ماخبرنا جيل بالاجيال فاته
في وصوفه وقف الشعر وتحير=كن قدمي سيف عنتر واستماته
الجمال اليوسفي عنده مجير=في عيوني غيره الله لا شماته
لا يشبه في حلا الريم المذير=اشهد ان الريم ياخذ من حلاته
عام قبل العام في حكمه مسير=في وعوده همة القلب وعزاته
واخر الاخبار ذكرته يسير=زاد فقر الذيب وإلا ياغناته
يامنير العمر عمره ماتنير=من قديم الوقت تطحنا رحاته
وان ذبحني علموا به كل خير=يرفع الكفين لا خلص صلاته
التسامح زين مافينا تطير=يسعد القتال في باقي حياته
بس في موضوع لا يمكن يخير=يعتبرني واحدٍ من ذكرياته

لا اقبل الليل والنسناس هز الجريد=ياوجودي ليا لجت عصافيرها
يجتمع بي قديم الهم ضمن الجديد=دورة الوقت تستفزع دواويرها
ضلمة الليل للعشاق ساعي بريد=والشتاء زاد مدتها وتطويرها
كل ماجبت بالتفكير رايٍ سديد=سابقته الجنوبيه معاصيرها
غيرت وجهة الربان عما يريد=لو يحاول يجاهدها على سيرها