ديوان الشاعر نواف بن هلال ابن نومان الفريدي

طب علم النفس ..مابه لي طبيب=والدواء المزعوم.... رجلي والقبر
الطبيب.. اللي ترك قلبي ..صويب=شح في وصله.. ولاجاني خبر
كسرة الخاطر على الجرح العطيب=كالزجاج ...اليا انكسر ماله جبر
ارسل المكتوب لاكن ما يجيب=هو حياء في داخله..؟ والا كبر!!
اكتبه من دم قلبي...للحبيب!!!=كيف صار القلب دمه لي حبر. .؟
لو دريت انه يبي غيري صحيب=كان ما عنيت قلبي له شبر
وماشرهت بحب مقطوع النصيب=والزمان يدور... والدنياء عبر
بالمحبه...ياتصيب ..وياتخيب =مامعك ياخافقي غير الصبر

يامعجزة طب روحي عالجي روحي=شوفي بكشف المشاعر وش معلقها
المشرط اللي بكفك فيه مصلوحي=واناملك تلزم ظلوعي وتفهقها
لدي بحرصك وحسك لأعمق جروحي=بيدينك اللي عسى الله مايعوقها
خيطي جروح الزمان ولملمي بوحي=والا الرئه بأزرق الدخان محرقها
ماباقي الا الونين ومن صدى نوحي=والروح ياغايتي بيدين خالقها
الناس في نصرة المظلوم ماتوحي=اذانها مفتحه وقلوبها صقها

قصيده قلتها في صاحب السمو في 17-7-1434

سلام والشعر يسمو من سموك سلام=لين وصل اعزومي بالسماء للنجوم
عد ما هب نسناس الهواء واستقام=وعد وبل السحاب اللي يضف الحزوم
فيك يامن بلغ بالمجد ذروة سنام=بالتواضع على عزم الحصان الجزوم
بك محبة حبيب الشعب رجل السلام=وبك مهابة وجه سلمان جعله يدوم
والله ونعم بالاسماء ونعم المقام=وياعسى حظ من جامل بها مايقوم
فيك ياتركي ال سعود حار الكلام=كني اللي من حروف القصيد محروم
دام بعدك لمصلحة الوطن بالنظام=الله انه يحفظك خادم"ومخدوم
لايطول غيابك والضوامي احيام=حاول انا نشوفك بالسنه لو يوم
فيك تحلو الاجواء فيك يحلا الدوام=وبك نفل الحجاج وبك تزين العلوم
كل حرا" ليا ستل جناحه وحام=قام يرقى على متن الهواء بالعزوم
وانت من ماكر الاحرار يابن الكرام=يوم مافي سماء جدك طيورا" تحوم
الولا له قبل ميه وعشرين عام=عهد الاسلاف سيف الحق منه مختوم
والله انا لكم مثل الفشق بالحزام=مثل ما انتم لنا درع" بوقت اللزوم
عند كل الشعوب بحبكم مانلام=والله ان ماينكر المعروف غير الرخوم
باسمكم علقت شبه الجزيره وسام=كل عام بعام ورغم انف الخصوم
المشاعر قبل كانت بصدري صيام=ويوم جت في مجالك جعلها ماتصوم

ياسعد يوم التنهد واتاأفف
من صعوبة طب نفس وجرح خافي
هاجسي بالمجتمع لاطف طفف
ما يتمتم بالرخيص ولا يخافي
وانتحسف.... وانتلهف... ونتعفف
الكرامه غاليه والصبر وافي
ياثقل هم الحياه ولا يخفف
همها الا نك مع الله ..وامتعافي
ان بديت السر للناس المخفف
ماتشوف بصفوة الخلان صافي
ولانحفظ في رف دولاب" مرفف
عن دواليب الدهر يرفاه رافي
ولاستشف من الحياء ما يستشفف
لون جوه خرمسي والنو سافي
عن خلايا عقل تفكير" مجفف
الحقيقه تختفي والخل جافي
مير غنوها على الحرف المصفف
النوايا صافيه والستر ضافي

انا ما اتسلا بالقصايد اليا غنيت=اغني من الحره بحاسيس وجداني
يخفف وهجها بعض الأحيان لاسجيت=مع ارض خﻻ ساري مع الليل وحداني
بعيدا عن الشرهات ومقابل ألقتيت=ولا شي يزعلني ولا شيا" ارضاني
وليا شفت يانفسي مع الناس وش سويت=تبين من المجني عليه ومن الجاني
قبل كنت اجامل واجرع المر والحلتيت=وهالحين والله ما اتحمل ولا اداني
يوسوس لي الشيطان واقول ماسميت=ابا اصد حتى عن ربوعي وجيراني
انا حارس المرمى وشيطاني الشويت =الا يالله انك تمنع اهداف شيطاني
تناقض فكر محسوس في عالم التصويت=لنا الله كلا" يرفع آلصوت من داني
وعلى كثر ماعيش بتناقض ورحت وجيت=لقيت ان طب جروح الارواح مجاني
اداوي جروح الناس بالبيت تلو البيت=ولا فيه مخلوقا" من الناس داواني
ليااخطيت كلا شد حيله يقول اخطيت=واذا اصبت كلا صد عني وخلاني
اسوق المطيه للمطايا مثل ما اوحيت=وعلمن يبين لي.... وعلمن تعداااني
وانا دام اصلي وادعي الله لياصليت=عسى الله يسلم والديني وياقاني
ولاخنت عشرة كل طيب وجار البيت=ولاترتخي كفي عن مصافح اخواني
عسى من فدا بروحه عن اخوه حي وميت=يرجح بميزانه على كل ميزاني
واذا كان ماكفيت معكم ولا وفيت =لعل الردي ومقرد الخلق للفاني

ياطير ياللي بغصن التين فوق أتتب


غرد ..بالاشجان فرق.. احساس ومعاتب

يبحث خفى الصامتين ...ويتعب الكتتب

والا انت ياطير..لا قارئ ولا كاتب

شاعرك ماتب...عن بابه ولا عتتب

يسأل عن الوقت.؟ وكم باقي عن الراتب


عشك مرتب...وعشه ماهو مرتب


غرد ..لجل خاطر المهموم والا تب

. ياعين عادي ...صافي الدمع لابان
لاصار ماهو ذل والا حسافه
دمعةوفاء ..طاحت على فراق جيران
اللي نودعهم بمبنى الضيافه
وافين بالخوه وباللازم اخوان
تلقا بمجلسهم مزوح وطرافه
عشنا وعاشرنا مع الوقت عربان
وﻻ لحقنا غير قل الكلافه
حياتنا تفنى على الارض شتان
تحيي بمكفي الهموم الصلافه
وبعض الدموع احيان واحيان واحيان
بعيون ماهي قابله للاضافه
والدمعه اللي حايره بين الاجفان
تطيح من جور الزمن وانحرافه
دارت دواليب الضغاين بالازمان 
ولا حكوا عنها رجال الصحافه
يامكثر الغفله وياقل الايمان
في قلب من ماهل دمعه مخافه
الشر يفتح له نوافذ وبيبان
والخير ملزم بالزمن والمسافه
والحق له مبدى دلايل وبرهان
مثل النهار اليى انبلج بانكشافه
اخوان بالدنياء وبالدين خوان
بالمال والا بختلاف الثقافه
صارو شياطين انسه اكثر من الجان
ياشين والله ميلته واختلافه
ماشاف هفواته مريش وطمعان
مير البلا من شاف وقته وعافه
هذي شهاده يازمن لبن نومان
ان كان ماحي سمع به وشافه



المصدر : انواع الدموع - مجالس الفرده انواع الدموع