ديوان الشاعر نواف بن هلال ابن نومان الفريدي

ياصاح صاحبك راح الصيف ماصيَف=والصيف شرٍ على قلوب المواليفي
فلا تحسبني ببعدي عنك متكييف=والا آخذ راحتي والا على كيفي
ماغيرك احدٍ هواه القلب ياسهيَف=من بد كل الاسامي والتواصيفي
عن حب غيرك من الخفرات متعيَف=ياغايتي ياهواء بالي وياريفي
ياعل شمعة غرامٍ نورها ضعيف=يقطع عليها المواصل والمصاريفي
لكن انا اسج لي ايام واهييف=ولوينكسر خاطري ماينكسر سيفي
وابو للسانٍ صدوق وقلبٍ نظييف= تضحك عليه المقرد والملاقيفي
والناس راسٍ ثقيل وراسٍ خفيف=تطرق عليها الهبايب والعواصيفي
ويلفي لها هادم اللذات ويضيف=وروسٍ حسوفه وروسٍ لذواليفي

ياللي تبي من جملت ابياتي ابيات=عساك تطلع لك بجملة مفيدة
انا شعوري من صدى هاجسي مات=من يحيي احساس الشعور ويعيده
لو اتعرض للخطوت العريضات=ان اشملت والا اجنبت رحت سيده
مدام قولي قول واسكاتي اسكات=اشك في صحة كلام الجريده
للحزن بعيون الاوادم علامات=وكم واحدٍ عمى عيونه من ايده
ياجرح قلبي لاطروا الشعر بالذات=جرح الصويب اللي تمثنى وريده
جرحه عطيب ووقت من يدركه فات=وموته رام ولاهل بيته فقيده
من قال قلها قلت له عشر مرات=ليش الكلام اللي نقوله نعيده

آلآ ياإله الكون يامحيي الاموات=وآلآيامميت الحي يالعادل القاضي
ياعالمن بالغيب ياجابر العثرات=عساني من اهل الخير واعض ومعتاضي
واليا فات نصف الليل لي بآخره ركعات=اسالك رضى وجهك بروحي وانا واضي
ولا ليلةٍ فيها الهواجيس ود وهات=وساعه عن الحاضروساعه عن الماضي
لها بالزمن وقفه لها بالعمر وقفات=ولامنشغل فيها ولاني لها فاضي
وللوقت كلمه مثل ماللكلام اوقات=ولا طال صبر الصمت ماحسن الفاضي
يالو ماعلى المكشوف نستثني الغلطات=مابآدم وحواء بيننا وحدٍ راضي
لنا ماعملنا له والاعمال بالنيات=مثل مانوايانا طويلات واعراضي

جيت من سفر بعد مده ليست ىبالقصيرة واذا بهاجر تبكي . طاقها ابوها مادري
امها.. وجت تشتكي ومافهمت عليها المهم انها زعلانها وانا ضايق خلقه

وبحاله لاتسمح بان ترى الدموع...

ليه ياهاجر وش اسباب الدموع=قولي لخالك علامك وش بلاك
قولي للخالٍ من الدمعه جزوع=من دموعك هل دمعه من غلاك
قولي للخالٍ من الدنياء قنوع=مانسى درس الزمان ولانساك
ريحي قلبٍ خفق بين الظلوع=مستهيم وزاد همه من ابكاك
ليه مابكي لا بليد ولا قطوع=بس انا رجال وانتي وش وراك
طفلةٍ فيك البراءه كل نوع=ونظرة عيونك تبين عن خفاك
والا انا بادٍ حياتي بالرجوع=ولايقارن مستواي بمستواك
من ربوع العام لين آخر ربوع=وحال خالك من هلاكٍ في هلاك
حاصلٍ له بالدهر قلة سنوع=مع هذاك ومع هذاك ومع هذاك

خاطره في خاطري....

والله اني ماتوقعت مادري ماأهقاء=ينخدع فيني صديقي وغيره في حريق
مستعد اقضي الوقت من دون اصدقاء=بس ماخون الصداقة وينساني صديق
باقيه يانيت الخير لله البقاء=للأسف ماكل دربٍ يبين له رفيق
ون تخلو عنك الاصحاب مع درب الشقاء=والله ان تشوف ناسٍ على نفس الطريق
المشاعر تنجرح غصب والدنياءمحقاء=كنها تقول انت بالمجتمع خبرك عتيق

الا ياهاجسٍ قلبي مقره=يسريني على روس الهضابي
ياليت يفكني خيره وشره=عسى ماهو بهالدنياء عذابي
لمحته بالنظر مره ومره=ولابرقت به من كثر مابي
لقا مع مايسره مايضره=وانا اطمع باليمين اخذاكتابي
اشوف الضحك بوجيه المغره=مثل قولت يالهوووي ياخرابي
عرضلي بالخلا منقوز جره=وانا ماشعب وراء الغادي اركابي
يفر الراس والا مايفره=لافر الراس مسبوع العلابي
وانا لولا الشعر لله دره=من يمثل حضوري في غيابي
احسَب له من نجوم المجره=وعلى كل اتجاه احسب احسابي
بلاي اني لياجيت أتشره=تعود شهرهتي مثل انسحابي
ولاردوا للتفتيش الاصره=زهاب احمولهم ماهو زهابي
افك من القهر ثوبي وأزره=يلوموني وانا اشقق اثيابي
كبرت بعين جساس بن مره=ونار الصبر في زهرة شبابي

بعد مرور سنه من عدم كتابة ولو بيت واحد اتصل فيني الاخ العزيز
الرائد (الشاعر)خالد بن حواس المطوطح العنزي ( ابوغلا) قال لي : وش الجديد وكنا
في اول ايام الشتاء
قلت :

طال ليل الشتاء يابو غلا وآهجاد=من سرتبه هواجيسه يعيد ويزيد
يوم كلاً رقد ماهوب وأيا الرقاد=نوب ياقف على حيله ونوبٍ مسيد
مثل حالي وحالك ياجريح الفؤاد=في مجال السعادة مابنا اللي سعيد
آآه وآجرح قلبي جرح سيلاً لواد=له ظلوعي صفاء واعروق قلبي هميد
اعطبتني ضروف الوقت على انفراد=مثل ماأعطب علي الرنج عبد الحميد
جيت يمه يصلح موتري قال باد=(شور اي تشينج اوول اف ذيز ات واز نيد)1
وأخلف اسلاك كهربته وراحت رماد=هل بنا يامعاوين الدهر من مزيد
ترك الأخطاء يساعد بانتشار الفساد=والمحاباه وانواع المجامل مبيد
احسب اني تركت الشعر منا وغاد=لين هبت نسانيس الهواء لي قصيد
ويوم هبت هبوبه مع هبوب البراد=ابتداء الواهس الشعري وجا من جديد
فيه من فاد في شعره وهومااستفاد=وفيه لو كان مافاد العرب مستفيد

عاد هي جت انجليزيه ومعناها غيرت كل ماكان يحتاجه وبالامكان الأستغنى عن البيت

قبل تقريباً ست سنوات بعد مافاز الشيخ عليان الطهيمي الذي رفع راس حرب في ام رقيبه
وكنت وقتها بالدوام وكان عندنا ضغط عمل والاجازات موقفه
وبعد مارجع من المزاين الى عرق المظهور واكان جارٍ ل ابوي في ذالك الوقت
علماً بان من المفروض ان يكون الاول في السنة التي قبلها عندما اخذ المركز الثامن ظلماً
المهم
انفكت الجازات وجيت لهم وكان معي جمس بليزر آن ذاك

يالبليزر مانت وارد بهبهاني=لو لقينا من وصوفه فيك عينه
جمس مثله تطوي الخط بثواني=لاكن انك تختلف قير ومكينه
لانت حوض ولاتسمى سبرماني=اقطمٍ فيك الدبل متكاثرينه
يوم احدك مع خطات الدرب ماني=حاسبٍ للبر والا للمدينه
شد حيلك في زماني ماكفاني=وازبن اللي كلبونا خابرينه
يم ابو فواز راع الويضحاني=وابك اباسلم على خشمه وعينه
ويوم فاز وحدني دونه زماني=ماحضرت وكل ربعي حاضرينه
ادري انه في قصيدي ماحتراني=بس شئاً ودنا انَا قايلينه
ياهل الذيدان ياقاصي وداني=فيه سيفٍ للمواقف ذاخرينه
اركدوا ياهل المغاتير لسماني=ماقفه بالطيب مانتم واصلينه
جامعٍ له غيرها عدة معاني=ولايخالف فعله بدنياه دينه
وبانيٍ له للكرم عدة مباني=من لفاه يقول يالله لاتهينه
ويم اعدوا للزمان وللمكاني=وقفوا ووجيههم زينه وشينه
طبن الميدان وضحٍ طيخماني=كنهن خلقاً لوجه الارض زينه
حول راعيهن تغشلاهن جناني=خلن الجمهور مايدرون وينه
يسألن اللي ركب فوق لحصاني=ليت ابو فواز ماهم مزعلينه
وجابن الاول وفازن عام ثاني=والاودم كل شئً خابرينه
خلن الحاسد يعاني مايعاني=فرحوا الصحابه وزعلوا مبغضينه

هذه قصيده جتني على الجوال ولااعرف من قايلها
الى يومنا هاذا
وقد رديت عليها ولكن بعدما عرف صاحبها اولاً واسوف اخبركم بالرد
ارجوا من يعرف منكم صاحبها ان
ينورنا جزاه الله خير

اباسأل الشعار واهل المراسيل=اللي لهم في نكبة الوقت خبره
وش حل منكوب الزمن والغرابيل=اللي قضاأ من غدر الايام صبره
يبني على الماضي وينسى المقابيل= وتموت في صدره من الغبن عبره

وبأمكانكم الرد
لتنتفاعل معاً ولكم جزيل الشكر

الحقيقه هو لم يتجه الى ربه في مصيبته

يبني على الماضي وينسى المقابيل=ويجرد ايدينه على حفر قبره
الياس يقعد في نفوس الهراميل=الا مع اللي لاشبر زاد شبره
الصبر مايبحث خفايا الرجاجيل=والحر به ميزه وصمله ودبره
والونونه مامن وراها محاصيل=حنا يكفينا من الصوت نبره
ايامنا فيها من العدل والميل=وياكبر يوماً ماحسبنا لكبره
ان كان للايمان بقلوبنا حيل=ناخذ من اولى قدرة الله عبره
لله من خلقه عبادة وتهليل=ومن صد لاشاف المصايب يخبره
والفلسفه مالي عليها مداخيل=الا الصراحه لو لها موضع ابره
ولوقيل حللنا عنأ الوقت تحليل=لازال ينقصنا جراءه وخبره
وصدام طشته الحيل والمحابيل=مافاد فيه الشعر كسره وجبره

واذا كان لغز اتمنى الحل بالبيت الخير