ديوان الشاعر الكبير / علي بن زيد الفريدي (قصائد)

في طيب القول لي مقصد ولي غـــايه = سيفي لساني ولي بالقول حريه
قول العوارف تشعب مالــــه انهــــايــه = ولاكل ناطق يوفق بالميــه مــيـه
من صاب قوله تراه يصيب في رايــــــه = ومن تاه قـوله تصـير ارياه مجفيه
بعض البشر فيه راي وعرف وهـدايــــه = لكن بعض البشر بواطنــه ســيه
والبعض فيهم حكيم وعنــــده ادرايــــه = يملك جزيل الكلام وصـافي النيه
لكن بعض الاوادم منــــــطقه تـــــــايه = يتعب على الهرج والاهداف ملويه
اما يكون الهدف تضليل وغـــــــــوايـــه = ويوجه النــاس لاشيا غير مـرضيه
في منطقه يعجب الجـهـال با غـــرايــه = رجال في ظاهره في داخله حيه
والاتكلـــــــــم نفــاق وزود وصـــــــايه = ومن الطــمع كثر الروحات والجـيه
ويردده عنـــد بيـــاعــه وشــــــــــرايه = ويفخر بقوله عسى تزلف به الطيه
مبدا المنافق يخالف كـــل مــبدايــــــه = ذلـــيل كاذب وكل أريــاه ســـلبيه
انا احترم من صدق لوهــــومن اعـــدايه = واكره اسلوب المنافق لوقرب ليه
والآخر اللي كلامه سب ووشــــــــايه = لاجل يتطفل على بعض الطفيليه
يجيب هرجه ويـــرجع منك بحكـــــايه = ويـحط عنوان للهرجه ومـــاريـــه
ينقل لي الهرج كنه يطلب ارضــــــايه = ومني يودي كلام زور رديــــــــه
عينه عليه ولكن يرصـــد اخطـــــــايه = وان كان ما خطيت صورها خياليه
فرق تسد غايته ويسوقها اهـــوايـــه = يوهم بنصحه وهو قايد حــراميه
بينت للي سمع رايي ومغـــــــزايـــه = مبادي ماتناسب مع مبـــاديــــه
بالناس جاهل وفيهم كـــيد واعصــايه = وفيهم اضعيّف وفيه افعال كيديه
وفيهم ارجال تدير الــوضع بعــــــنايه = اهل ملازيم مكشوفه ومخفيـــه
منطق سليم ووفاءللدين حمّـــــــايه = تسرك افعالهم ووجيههم حـــيـه
ارجال لهم بالمواقف ترفــع الــرايــه = راية محبه من الاعماق مثنيـــــه
هذا كلامي وكـــل انسان له غـــأيه = والقول والفعل مبني على النــيه

ايالله يارزاق يارحمن يامعبود =دعيتك ياكريم الوجه ياربي تعافيني
انا بحماك وانت اللي على ماتكتبه محمود =الاياسامع الداعي من الامراض تشفيبي
انا مقصّر انا مذنب وعطفك ياعظيم الجود=وسيع ورحمتك ينعم بها حتى المسيئني
لقيت الناس موجودين مادام الرخا موجود=وليا عانيت مس الوقت كل صارناسيني
فذا يجامل وذا مقفي وذا كاره قليل الفود = يكن الكره كن الشر جاري بينه وبيني
زمان غير المذهب وعقب بالقلوب الهود =وكثر الشر واتغييربالاخلاق والديني
تفشى الخبث بين الناس والافساد والمنقود= الايالله تسترني وترحمني وتحميني
يخالفني برايي عالم تفكيرهم محدود = قليل المعرفه له راي يبغى معه يثنيني
وانا رايي على مبدا ولي بالعارفين اشهود = ليا مني مشيت الدرب لي راي مكفيني
وصلاة الله وتسليمه عدد مابلوطى من عود = على طه الرسول وسيّد الغرّ المياميني

قـال الذي عدّا براس الجذيبـــــه = لحظة زعل ماهي هواية مــراقــيب
من واقع يشعل بقلبي لهـــــيبه = وغيري كثير يحس منه اللواهــــيب
ياهل العقول المدركـات اللـــبيبه = ياللي لكم منهج وتفكير يصــــــــيب
وشرايكم في ذاالسنين العـجيبه = اللي بها خبثت جميع المشــــاريـب
والغالبين استسلموا للغـلـــــيبه = وصار الثعل يستاسر الليث والــذيب
وابو حقب في وسط كور الـنجيبه = وراع النجيبه عرّضوه المشــاعــيب
واهل اليدين المطلقه في مغيبه = واللي حضر ترمى عليه العــذاريب
المحترم يمناه في وسط جـــيبه = وابو وعد ركب لثوبه مية جيــــــــب
والخوف بالرجال ساس المصيبـه = لوكان حاضر كـل شي به يغـــــيب
ومجامل فيه المهونه معــــــيبـه = وعيش المذله واحتمال الاذى عيب
والحسد بالرجال يردي نصيـــــبه = والحقد يعمي صاحب الحقد ويخيب
أشوف ظاهرة غريبه عجـــــــيبه = كثر الطمع بالناس والــشك والريب
المـــاده تجـمع بامــور مــريــــبه = حرص على الدنيا بكل الاســـالـيب
وحب الاذيه عند بعض الشـــبيبه = أهل المشــاكل تاركين المــواجيب
وشفت التقاعس بالضروف العصيبه= عند الشباب وعندبعض من الشيب
واشوف ناس للغلـــط مستجيبه = والــوقت مايقــبل تعــــبث والاعيب
الحر عند الجــد عقــــله طــبيبه = والاضعيف الراي لوغــاب مايجـــيب
يرضى الاهانه لين يذهب ذهيبه = ماهو من اللي مطلبه شمّـخ النيب
لايــــودي المعــروف ولايجـــيبه = ومن لاتأدب مـــانفع فـــيه تـــاديب
الطيب يتعب والمراجل صعــيبه = ولايندم اللــي يفعـل الخير والطيب
واللي مشى درب وهو يستعيبه = هذاك ماله عند ربــــه مطــــالـيب
يدفــع حـياته والكـرامـه ضـريبه = قدّام احســاب الآخره والعــوقيب
ياهل الكـرامـه والعقول الاديبـه = يااهل المعرفه والــوفا والتجــاريـب
الدرس واضح والقضـــــايارهيبه = حتى الصحاري صار فيـهاشواذيب
وبليس طاغي والافاعي قـريبه = والمبعد الشيطان جـاله منـــاديب
والمنتبه صكوا عليه الـــــزريـبه = والملعبه كثروا عليهــا اللــواعيب
وان صار ماللبيت قدر وهـــــيبـه = يصطي عليه القطو والكلب والذيب
والوقت هذا مايل يندعــــي به = يرمي به السافل هل الخير ويصيب
به يفرض الباطل بعنف وغصيبه = وبه تفرض القوه ببطش وتخريب
به جور والفيران به مستذيبــــه = والخيرفعله صارخفيه وتهــــريب
ذي حــــالنا والله عــليم بغــيبه = والوضع يبغى له مواجه وتـرتيب
وكل على مسعاه والله حسيبه = لكن علينا في بلدنا مـــــواجـيب
ومن جامل المحظـور والارضي به= يصبح عشا جاهز لطفل الانابيب

قال الذي في عالي الرجـم عـدا=وابحر مع الهاجوس والجوهادي
ابحر مع ا لماضي بسرعه وهـدا=العمر يفنـى والليالـي اجـدادي
هذا زمـان كـل مـا جـاب ودا=هذا انتهى وآخر مع الوقت بادي
والوقت يمضي والليالـي تحـدا=وعمر الفتى مستسلـم للنفـادي
اللي قدي الـراي واللـي يقـدا=كل مصيره في مكـان انفـرادي
عينـت نـاس باللـوازم تـبـدا=كيف انتهى مفعول هاك الايـادي
من عقب ماهي للموجـه تصـدا=استسلمت من عقب طوي القيادي
واللي تعشى العود يبغـى يتغـدا=والوضع ماهـو قابـل للعنـادي
والوقت عانـد والليالـي تـردا=والسيل من وادي تحّول لـوادي
وابو حقب على القطامـي تعـدا=ركب الرديف وقادها اللي يقـادي

هذي القصيدة قالها مدح ومؤازرة للشاعر العلم عضيب بن هليل بن شلاح العلوي قبل اكثر من عقدين من الزمان عندما كان في مواجهة بعض المتعدين على قبيلة حرب

الجمس هاته وافحص الجمس ياغلام = وليا جهز مقدار ماقول حمّه
وهات القلم واكتب وانا امليك باحكام= واضبط احروف القول شده وضمه
اكتب كلام لامزيف ولااوهـــــــام = وباول كلامي راعي الخط سمه
كلام احلى من لبن در لانعــــــام = شقح النياق البارزات المزمه
مرباعهن بين الفويلق ولـــــّزام = ومقياضها الصوال تشرب مجمه
قول يدور بوصط فكري من العام = منزّه عن الخطاء والمـذمــــــــه
وان كنت ساكت فالضروره لها احكام = العلم واضح والمواضيع جمه
لكن بعد ماحمّضت كل الافلام = طاب الكلام ولي معانن مـــــهمه
تحمل سلامي والتحيه والاكرام = من واحد عّز الجمـــاعه يهمــــه
وترحيبة تبقى على مر الايام = عمق المحبه والمودّه تضمــــه
تاصل وفياً يوم احليّه ضرغام = علم السعد عنده وحوله ويمه
عضيب الحربي مقصدي والهنا دام= مخصصه بالقول من بين الامه
ابن الرجال اللي مشاهير واعلام = اللي لهم بالحق مبدا وهمــــــه
اهل الوفا واهل الكرم واهل الاقدام= كل يقول الحق عنده ويمه
من لابة تمشي على العز قدام = مع فعلهم فيهم تسامح وذمــه
مقومين الحق واركان الاسلام = واهل الشجاعه بالظروف المهمه
ربعي هل اللقوات من عصربن حام=من هازته نفسه بهم سال دمه
ليا قيل وصلوا حرب قيل السعد قام= الله عطاهم موقع فوق قمـــه
ذا قول من هو بالوفا ملزم الزام = قواعده من حرب خاله وعمـــه
ياعضيب يوم نك على الفعل مقدام = تخص من تبغى بعلم وتعمه
اعجبتني ياعضيب في جمع الارقام = وقص الاثر بالليلة المدلهمه
لك موقف هديت به حيل الاخصام = خليت شبه العير يرجع على امه
سجلت توضيح المعاني بالاقلام = وقطعت راس الداب وابطلت سمه
دعست راس اللي تبجح بالاقدام = ليا رفع راسه وقع في مطمه
وللي نوى يشري تراجع ولاسام = واللي حفر حفر تراجع ودمــه
من عقب زل وذل وقع بالابهــام = واعذر بدرب ابليس من عقب خمه
حيثك ياليث تجيد تفسير الاحلام = وبقدرة المعبود رايك تتمه
لك ياقوي الباس تقدير ووسام = وسام الشرف ياللي قضيت المهمه

يا مسلم السامود يامدهل الجود = ترفع لك البيضا على روس الاشهاد
اذا وصفتك بالوفا عندي شهـود = تسود في فعلك على كل من ســــــــاد
لك موقفٍ ثابت ومنهجك محمود=لاجل الوفا تمشي على كل ما كاد
عارفك يا مسلم على الطيب محسود=وراع المروّه له عواذل وحساد
ماقول بك على جميع البشر زود = لكن حفظت الجود يا ذخـــــر الاجـــواد
الطيب يالطيب بحر ماله حــــــــدود = وانته مشيت الزود من ضـــــمن من زاد
لياعدوا اهل الطيب تصير معدود = سجلت نفسك يالوفي ضمن الامجاد
شكرًا يابو ماجد عسى ايامك سعود =ولعلـها بيضٍ تنـادي بعـــــــــــــواد.
الله يجيرك من حسد كل مقرود = يا طيب وافي على الطيب معتــــــــــــــاد

في رثاء المرحوم بإذن الله محمد بن عبدالله العسيلي

الله من قلب عليل ومنصاب = شي قديم وجاه علم يزيده
نجم لمع في حرب عقب ارتفع غاب = غيبة مودع ّوالليالي مديده
هذا المقدر والمقدر له اسباب = وانا اشهد انك يالعسيلي فقيده
فقيدة على القبيله والاصحاب = وحتى الوطن يبكي لفقدك صعيده
فيك الوفا والجود للعز طلاب = وسيرتك في كل المواقف حميده
الله عطاك من افضل الوصف ماطاب= والعلم والحكمه مع اريا سديده
لانته بفحّاش ولانته بسباب = على النقا واضح سليم العقيده
بشوش متواضع كثير الترحاب = والمجتمع من فيض علمك تفيده
مواقفك بالصلح واعتاق الارقاب= كل عرفها والمفاوض تجيده
لكن عن المكتوب ماتفيد الاطباب = الله بحكمه فاعل ما يريده
يالله ياللي من ترجّاك ماخاب = يامبدل الدنيابحال سعيده
يامعطي الجنه ويا رب الارباب = ادعوك باسماك العظام العديده
تكتب له الجنه بلا عقاب وحساب= وتنجيه من حر اللهيب الوقيده

حار القدم ياسمير مافيه مسيار = الرغبة الأولى ماهي رغبة له
من يوم غاب اللي لنا عز وإستار = والرجل عن بعض الطرق مستقله
ياساكنين الدار وش غير الدار = وش علم دار العز صارت ممله
خيم ظلام الدار من عقب الأنوار = وأنا عليه خيم الجو كله
ياتل قلبي ياملا عقب ماصار = تل الهزيل اللي خصيمه يتله
ونيت ونة من عليه الدهر جار= عقب الفرح والعز بغثر محله
في ساعة حرجة صديق الرخا بار = علة زمان وداخل الجسم عله
بين الضلوع أونس مثل صالي النار = وباقي إعظامي كنها وسط مله
على وليف غاب عن كل الأنظار = غيبة مودع والملا مقتفي له
من يوم أبو بندر على المتبع سار = سافر عزيز ولا طلب غير حله
ودع أكبار وودع أطفال صغار = تسعة من الأطفال في حاجة له
عليه عيني هلت الدمع مدرار = وعليه يرخص دمع عين تهله
اللي رحل ماباقي غير تذكار = محفوظة بالقلب مع صورة له
أخذ من الدنيا فقط تسعة أشبار = من الخام الأبيض ذرع مافصلن له
أدين بالاسلام وأومن بالأقدار = وهذا قضاء ربي وأنا صابر له
مرحوم ياللي ماسلك مسلك العار = ولو زل غيره مايجازي بزله
ولا عمرهم قالوا تطاول على الجار= ولا عمر مخطية السوالف مضن له
يصبر على غلطة زميله ولو ثار = يغضي تقل في ثورته مافطن له
يمشي على درب الشرف سر وجهار = به خف نفس وفيه زين الجبله
ماغيروا فكره غريبين الأطوار = حصن حصين ومجلسه ماتمله
في مجلسه تلقا أهل الكيف والكار = أهل الوجيه اللي قبل مسفهله
صريح في ممشاه مالف مادار = ودع أهل الدنيا نظيف سجله
اختاره الرحمن من ضمن مااختار = يالله عسى الجنة بعطفك جزا له
عسى مقره يوم زوغات الأبصار= في جنة الرحمن ينعم بظله
عساه يوم البعث من ضمن الأبرار = يالله عسى حسناته يضاعفن له
ياناقل الأخبار ياشين الأخبار = علم نقلته حط بالقلب خله
عقب الخبر هلت عيوني بالأعبار = وزهدت حتى في وجود الأخله
عفت الجميع وعودت عشري اصفار = مافهم من الواعظ وأنا مصغي له
ليت الليالي ياملا تعطي إنذار = وتعلم المخلوق وشمقبل له
وقبل الحدث ليت الزمن يعطي إشعار = يدري به اللي خالقه ممهل له
مار الزمان الله يجازيه غدار = اللي غفل في غفلته يستزله
قلته وأنا عندي إيمان بالاقدار = ماقدر الله للفتى صاير له
وأدر إن عند الله تحديد الأعمار = يسعى الضعيف وخالقه كاتب له
وأدر إن غيب الوقت من ضمن الأسرار = مما مضى عندي دليل وأدله
لكن حزين القلب يسلى بالأشعار = يشرح بها الملهود عن ماحصل له
ويندم على الغفلات ويورد أعذار = ويعتب على سود الليالي المضله
ليا شاف من الأيام ميلات وإدبار = قال السنين أيامها مانصفن له
ولوقت به ميلات ويساعف مرار= وكم من عزيز ذاق طعم المذله
قدامنا قد قالوا الوقت دوار = واللي يقدم من عمل باقي له
أقولها من عقب فكرت بابصار = وفكرت بادقاق المسايل وجله
لكن مع المكتوب ماتفيد الأفكار = الرجل يخطي في طريق يدله
والله بعون العبد مادام صبار = والرجل يذنب ويحدث منه زله
ياللي تجي بندر ليا رحت زوار = من الكلام اللي على البال قل له
أنته ولد سلطان من ناس أخيار = ساسك عزيز وغيرنا شاهد له
ان شفت من مس الدهر ضيم واعسار = عليك ياللي كل عقد يحله
صحيح لك ربع ومحبين وانصار = لاشك اذا حملك بنفسك توله
وتجنب أهل الحقد والناس الأشرار = خلك عزيز وصاحب السؤ خله
ترى بعض الناس خادع ومكار = مصادقك في حاجته يستغله
وبالناس نمام وبالناس مهذار = وفيهم خبيث بلا سبب فيه عله
وبالناس راعي شر للشر سمسار = حب الأذيه والأذى يستحله
وبيت الردى لابد يضعف وينهار = يفداك من بيت الردى منزل له
بيت الردى لو كان من عشرة أدوار = عن الرجال اللي تعرفه مزله
وبالناس أهل وقفه حصينين الأسوار = مثل الغصون المثمرات المظله
وبالناس أهل وقفه حصينين الأسوار = مثل الغصون المثمرات المظله
ولا حد بمقياس الرياجيل يحتار = الطيب واضح والردى معاكس له
هذا كلامي والمعاني لها أدوار = ومافات مات وكل شي بحله

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــ
رثا/ سلطان بن نغيمش الفريدي رحمه الله

وسط البراري مشيت وجوها اعجبني = باتلى العقارب وماسومه وممطوره
ولقيت طير برفع الصوت جاوبني = بنت من الوضع مبسوطه ومسروره
ولقيت رجل بخفيه يهدم ويبني = ابو شنب بالصحاري عارف دوره
بغيت قربه وهدم البيت تعبني = له غرفة داخل البدروم مستوره
ولقيت رجل على رجليه وارعبني = ينفخ عليه قبيج اللون والصوره
رفع عصاه ووقف كنّه يطالبني = بلسانه اللي يمدّه تقل باكوره
ومن بعد هذالقيت اللي يناسبني = رجل يشيل التراب براسه وزوره
علامته جارته واللي مكذبني = ينشد عن امثال بالمذكور مذكوره
ولقيت رجل لياجيته يراقبني = يهز راسه بتعبيره عن اشعوره
كنه على وقفتي عنده يحاسبني = ويدير عين تقل حبة بنادوره
لاني بخافه ولا شكله مرغبني = خله يروقب بقشع البر وجحوره
ولقيت رجل صلح لي لكن اتعبني = عطل علي الوسيله من كبر جوره
ابغى ادّبه بالوسيله لكن ادّبني = قربه يونس ولو في قربه اخطوره
ولقيت بنت بها الخيال عا قبني = تلوح لي من بعيد وتقل مغروره
ولقيت رجل مخيش بايمن المبني = سموه باسم الثعل والخير في كوره
وقابلت رجل يسير بعنف وانشبني = لقيت اشدوقه بما يحييه محشوره
ولقيت رجل ماحب انه يقربني = وما قرّب الارض لاتامن من اشروره
ولقيت لي ماكرثم فرّهايبني = عطيت له ماكتب الله ثم دفن سوره
لكن خضر الروابي شوفها اطربني = والرجل في سجة للبر ماموره
يالله باسمك دعيتك لاتخيبني = تغيث دار شواها الوقت وادهوره

الف الف شكر لك يا ابوزيادعلى اضافة ديوان الشاعر علي بن زيد الفريدي

درر نظمها في عقد من الشعر الجزل والحكمة والقافية الراااائعة

تسلم يمينك على الاضافة الرااائعة