ديوان الشاعر الكبير شريف بن راكب الفريدي

ثم وصلت القصيدة للشاعر مبارك بن حديد فرد بهذه الابيات

لابـاس ياللـي بالـغـرام يتـغـزل=اللـي شكـا مـن ماقـف حـاصلله
يالي عذلـت القلـب والقلـب ماكـل=جـددة للـي قـال بصـري بحـلـه
جـددة لـلـي قــال بـصـري أول=وللي لقاء الطيـار مـن جـور خلـه
من الوحيد اللي من الحب مـن سـل=كم واحد قبلـك هـوى الغيـد سلـه
ولنت الوحيد اللـي بنـاء للهوى تـل=بـروس الهضـاب النايفـه مرقبلـه
عندك خبر ويـش الوليعـي تحصـل=من راس رضواء وادع الكـون كلـه
وعندك خبر وش جاء الدجيما من أحيل=وعقب شرب كأس الهوى وش عملـه
وبحر الهوى غبـات ومـواج وهـول=وكـم واحـد در البحـر ماحصـلـه
مابيـن جـزر ومـد يقطـع وياصـل=ولـذات نفعـه ماتقابـل عـن لــه
إليا قـام مقصـوف الشبـاب يتغـزل=ولـد ونظـر نظـره غـرام وتولـه
وهنف دلـع وأعلـن تحديـه وأقبـل=تقـل يعـد أخطـاه والـردف تـلـه
ومن شافها بالوصف لو كثـر أمقـل=يحتـار فـي شكلـه وقـده ودلــه
الله عطـاه مـن المحاسـن وكـمـل=وكمل جماله في حسـن منطـق لـه
لو شافها اللي فـوق مركـاع يغـزل=جـدد فعـل بصـري بنفـس مغلـه
وهذي أدروب أهل الهوى أجداد وسمل=وراع الهوى طـرد الهـوى مايملـه
وأصفح وسامح مـن سطابـك وحلـل=لجـل جمـالـه قـلـه الله يحـلـه
وختامهـا وحـد وسـبـح وهـلـل=وقـت التهجـد تالـي الليـل صلـه
وعـداد مالاحـت أبـروق تشـاعـل=صلوا على العصـوم عـن كـل زلـه

هذه قصيدة للشاعر / شريف بن محمد الفريدي موجه للشاعر عوض بن خاتم الروقي خاصة ولقبيلة عتيبة عامة
مع التحية والإحترام لهذه القبيلة

ياحمود بالله كان عندك زياره = يم الديار اللي جنوب(ن) عن الحيد

لاصحابك اللي معرفتهم تجاره = معهم قضينا ليلة (ن) كنها العيد

خذلك عليهم جولة(ن) وأفتراره = وسلم على الوافين جمله وتفريد

عم الجميع وخص راعي العماره = وصل لبوبدر الخبر مثل ماريد

حاول على موعد يتم اختياره = وترا البطا يحبط بعيد المواعيد

وإن تم بشرني وخذلك بشاره = من شأن يبقى للعلاقات تجديد

الطيب باهل الطيب ماهوخساره = دين(ن) يجيله عبر الإيام تسديد

ياللي منازلكم بعال الصداره = حاضر وماضيكم عن الواقع يشيد

العــز يالهــيلا رفعتم شعــاره = وعندي على قولي دلايل وتأكيد

انتم مثل سورن صعيب انهياره = بالصين صاغوه الطغاه الصناديد

وانتم مثل مبنى قديم الحضاره = بارض الكنانه غيره البنى تقليد

وانتم مثل سيف(ن) لياجا نهاره = مال الجروح اللي تحطون تضميد

وانتم مثل موج(ن) يزته اعصاره = ليا هاج صار المد للجزر تهديد

وانتم هل الفزعات رمز الاشاره = تردون يالهيلا صعيب المواريد

وانتم لكم رمز(ن) فريد العباره = ذباحة الحايل ومن خالف السيد

رجـــالكــــم وحــده يمثل وزاره = يحط له فوق الصعيبات تمهيد

ويسمح من اسمه غاب عني إحضاره = الشك زايل والثقه دون تحديد

ولويخطي الشاعر يصيب اعتذاره = وعسى الدفاع يصير فزعة جلاعيد

ماكل من هدف يحقق عياره = احد(ن) يعود من الجوازي بلاصيد

واخير من كثر الكلام اختصاره = ماينفع الزايد ليا صار مايفيد

وصلوا على اللي فوق قبره مناره = مع سيرته حكمه ورحمه وتوحيد

وســــــلامـــــــــتــــ ــــــــــكـــــــــم

الشاعر الكبير المبدع دائما / شريف بن محمد بن راكب الفريدي

قرأت له قصيدة في جريدة الجزيرة هذا اليوم احببت ان انقلها لكم


ارجو ان تنال اعجابكم:


بعض القصايد

يقول من قال واهدى بالشعر شوره= رجلٍ يقول الحقيقه سر وجهاري
نفسي على كلمة التوضيح مجبوره= لو كان ضدي علي أو لي ما داري
هاذي نصيحة تخص أفراد مغروره= لعل كلٍ يشوف حسابه الجاري
من لا يجيب الهدف لا يلعب الكوره= ومن لا يعرف الخطا والصح لا يباري
والشعر ما هو وليد ابيات مكسوره =نحتٍ بصم الجبال ونقش معماري
بعض القصايد علمها الصوت والصوره= ومن المعان الثمينه جسمها عاري
اليا تتبعتها بالصحف منشوره= اتملل المستمع وتعقد القاري
واليا صفا صوت راعيها وديكوره= وصفق له اللي يعرف الشعر بالطاري
حدر الثلاثين معظم سن جمهوره =روح عن الليل قدم الناس يا ساري
وبعض القنوات تقل احيان ماشوره= تنشر مثل ما يلمه بالذرا الذاري
كلٍ يقدم لها مده وميسوره= ما همها كلمة الميّد من الزاري
يا ليت مع غيرها تاخذ لها دوره= وتشوف وش مطلب البياع والشاري
والا تقفل برامجها ومشكوره =اللي بلا فايده ما نشره اجباري
ولا قول انا الفاهم الناقد لدستوره= لا كن ماني لتطويف الخطا ضاري
ويا الله عسى الروح يوم العرض مستوره= في رحمتك يالعظيم الخالق الباري

ومع مواصلتنا لمساجلة شعرائنا من عيال راشد واللي اشترطنا

فيها ان تكون المساجلة بين شاعرين من شعراء الفرده اليكم

هذه القصيده لشاعرنا المبدع دائماً / حمود العويني ويسندها

للشاعر الكبير / شريّف ابن راكب الفريدي .

الناس ياشريّـف قصـيٍ مداهـا=ماهم على يامسنـدي ماتوقعـت
حيثٍ ما احدٍ سالـمٍ مـن غثاهـا=كيد البشر لاتامنه لـو تواضعـت
خلقٍ يا بن راكب قليـلٍ حلاهـا=مايتركونك بالسعه لـو توسعـت
لو انت مقفي ماسلمت من اذاهـا=ولاييدونـك بالسنـع لوتسنعـت
تذكـر مفاخرهـا وتقـل تجاهـا=عميا بصر تفسيرها يوم طالعـت
ماتنتعـدّل غديتـه لـو غداهـا=خبل العرب ماينتقنّع لـو اقنعـت
عفوش الرجال اللي قليلٍ حياهـا=يبون حذفي يمهم مار مـا طعـت
خل المسفـه تستشيـط بعماهـا=عن الهزيله والهزايـل ترفعـت
عسى نفوس الحقد تلقـا جزاهـا=يامن تحت عرشه وبسمه تشفعّت
لولا الرجال اللي تعـز اقرباهـا=قلت الكلام اللي ليا قلته اوجعـت
حبوس الرجال اللي يذري ذراهـا=في سمعت الغالين لااعطي ولابعت
اهل العقول اللي ملكنـي وفاهـا=اللي ليا جيبت سيرهـم تشجعـت
اولاد راشد مكرمت مـن نصاهـا=قلته وبا اقوله مثل ماقبل ذعـت
يتلون ابن حماد مـن دور طاهـا=شيخٍ بحومات الوغا ينّعت نعـت
يـوم القبايـل تفتخـر بومراهـا=سيفي ليامنّي للاضداد صارعـت
ماكـر صواريـمٍ تضـد اقبلاهـا=قولٍ على وضح النقا ماتصنعـت
دايم وغيبات الرفيـق انحماهـا=حطيت روحي دونهم يوم ذرّعـت
قومٍ جوايحها بـروس خصماهـا=وتلقا النقا في ساسهـا لاتتبعـت
كم سابقٍ منهم عطيـبٍ شضاهـا=لقال مصطور النشامـا تبرعـت
نعم الرجال مزبنت مـن نخاهـا=لي الفخـر بافعالهـم لاتطلعـت
ازعل زعلها والرضا من رضاهـا=ون حل بي ماجوبهم ماتجزعـت
والا الضعوف اللي ترهّم حكاهـا=لااقوالهـا وافعالهـا ماتسمعـت
يابايع الذمه ويـا مـن شراهـا=ماعاد ينظّفك البحر لو تسوبعـت

وهذا مرد الشاعر الكبير شريّف حيث يقول رداً على العويني

الله مـن نفـسٍ زعلـهـا حـداهـا=قعدت اجاحـد غيضهـا ليـن ولّعـت
فزيـت كنـي والقـدم قـد وطاهـا=جمرة غضا مع غاوي الرجل وارتعت
سمعـت بالدعـوه واجبـت لنداهـا=وعيبٍ علي ان كان بالحل ما ابدعـت
والله لخـل الخيـل تقـرع احـذاهـا=اما جدعت امبارزي والا انا اجدعـت
حمـود لـه قصـه عليّـه شكـاهـا=قصة شرف مع نشرهـا قـد تمتعـت
لـه قبـةٍ فـوق الثـريـاء بنـاهـا=ولـو اشتركـت ابّنيهـا ماتراجعـت
ياحمـود رجلـك لاتقصـر خطاهـا=دامك على عـرش الحقيقـه تربعـت
لاصـار حافظـةٍ سواقيـك مـاهـا=والله يمين انك عن الحـق ماضعـت
ومـن لايعـرف الطيبـه ماقنـاهـا=والحـر يلقـى واحـدٍ يثعتـه ثعـت
واهـل النمايـم قطّـع الله اعـراهـا=ما انت الوحيد لمرهـا لـو تجرعـت
اهل القلـوب اللـي تراكـم صداهـا=اليا وثقت بعملـة الخايـن اخدعـت
عسى ارضهم تجدب ويصحي سماهـا=وتبقى مثل وادٍ اليـا جيتـه اسرعـت
عنـدي نصيحـه ياحمـود وتراهـا=وجهت نظر وللاّ انت بالصاع قد صعت
بيـر الهلالـي لاتبـيـن غطـاهـا=تراي من مـوح الدلـي قـد تملعـت
يزتّـك اللـي ماحسـب وش وراهـا=ويضحك اليا منـك لبيضـك تنزعـت
وعـن القبيلـه بالفـعـول انتـبـاه=ترقـى العـلا بحبالهـم لوتمنـعـت
قبيلـةٍ يلقـى الوفـا مـن نصـاهـا=ما هو على اني غرسها يـوم دافعـت
والله لصـادم مـن يقـرب حمـاهـا=وعيبٍ اليا مني عن الحـذف خرعـت
ماهي بعـوز لمدحنـا مـن صباهـا=ما قول انا سمكرتهـا وانـت لمعـت
وفعـل القبيلـه منتـدى لشعـراهـا=وتدوم يانجمٍ على الكـون شعشعـت

المشاركة الأصلية كتبت بواسطة ذيبان

قصيدة شريف بن راكب الفريدي

في حفل قبيلة حرب
الذي دعا له واقامة ابناء الشيخ /
جازي الوسوس
رحمة الله

على شرف الشيخ/

حمد بن عنيزان الدوسري
واعيان قبيلة الدواسر

في بلدة طلحة

بتاريخ 26/6/1431هـ
http://www.alfredah.net/vb/showthrea...800#post154800

سميت باسم مصرف الكون تصريف = رب العباد الي على الناس جايد
واخذت من جزل التماثيل تقطيف = عوب البيوت النادرات الفرايد
صفيتهن مثل المغاتير مع هيف = ما ضيف للمعنى من الهزل بايد
لو ما يجارنّي على غاية الكيف = والله لا اسكر باب كل القصايد
عاهدت نفسي ما الحق المدح تطفيف = ما اقول كود اللي مع الناس سايد
اليوم كل اللي عليه الغطا شيف = عبر محطات الفضاء والجرايد
الوقفة اللي ما تجمّلك يا منيف =ما ني بها قدم الجماهير شايد
يا مرحبا بالضيف باسم اهل الضيف =تحيةٍ من حرب باولاد زايد
وجودهم تاج ومعزة وتشريف =وعرفة هل المعروف منها فوايد
تاريخهم معروف من غير تعريف = يثني عليهم بالرخاء والشدايد
يوم السنين القاسيات الشحاتيف = يبرا لهم حظٍ من المجد صايد
وان عودت للشلف وابرازة السيف = ديارهم عنها القبايل تحايد
حازوا على الوادي بعيد الأطاريف = وعنه ابعدوا فرسان كل البدايد
ضافوا له الرملة على شاطي السيف = يا نعم والله من قبيلة وقايد
مدهال خدرات البكار المواليف = رثم الخشوم وزاهيات القلايد
وآصل حمد واحتارفية وسط الأرشيف = كل الفعول الطيبة له عوايد
لو تذكر العلياء ورا خط بارليف = يطلع لها طلعة مع الجو رايد
الطيب لو ما دون بابة تكاليف = ما صار مدخالة على الناس كايد
يشوفه اللي همه المال ويعيف = يا عل ماله هو وماله شرايد
تم الكلام ولابقالي تحاسيف = وعيبٍ يجي قولي بليّا سنايد
وسلام احلى من حليب المعاطيف = اللي بعيد من القرى والحصايد

................

السلام عليكم ورحمة الله وبركاته
الشعراء الكبار عندما تقرأ لهم او تسمع لهم فإن إعجابك
بالقصيدة يجعلك لاتهتم بتاريخها او كون مناسبتها قديمة
وتحرص ان تكرر سماعها هكذا الحال بالنسبة لتلك القصيدة
التي بين ايدينا للشاعر الكبير : شريف بن راكب
في مناسبة مشهورة وهي مزايين قبيلة حرب للابل عام 1427هـ
حيث ارتجل هذه القصيدة في ذلك الحفل الرائع ...

طابلي حلو النبا ساعة وصوله=يوم شب اشعار وافين الخصايل
يوم نادا الشيخ قام الجمع حوله=وقفتٍ مع درب وقفاتٍ سمايل
طبعنا سود الليالي ما تزوله=لو تزول من الوطن ضلعان حايل
اسمعوا يا اولاد راشد ما نقوله=يوم كلٍ قال عن قومه مثايل
فوزنا مضمون غصب بكل جوله=واثقين بفعلنا والشك زايل
ما توصلنا العلا بطرف سهوله=لين قدنا بالشكيمه كل عايل
جمعنا اللي ضدنا يكره نزوله=من تعرضنا عرف نجم القوايل
يمنا الميزان مانقبل ميوله=ولانطيع اليا عرفنا الضد مايل
يوم كلن بندقه تسوى ذلوله=ما نجيب من السلع كود الاصايل
ويوم صار الدين حنا من فلوله=خيركم بالدين هم روس الحمايل
كان صار الفوز بامجاد ورجوله=جامعينٍ للوفاء كل الدلايل
وكان صار الفوز للبل والسيوله=كد تقدمنا وسوينا الهوايل
عندنا اللي مالكٍ درع البطوله=كاس ابو تركي مع الوضح الاوايل
جايزتنا جت على تقدير دوله=بين سكان الخليج من القبايل
وانتهى في جاه من ثبّت رسوله=بالبقاع اللي تشد الها الرحايل

هذه القصيدة موجهة للشاعر الكبير / شريف بن راكب
حيث اسندها له الشاعر العذب والمبدع دائما أحد أبرز
شعراء الفرده بالنظم شاعر يعرفه الجميع من خلال جمال طرحه
وروعة مفرداته وجزالت معانيه انه الشاعر : عبيد بن نهار الفريدي .
وسوف أنقل لكم قريبا رد الشاعر العلم : شريف بن راكب .

وش حل حلمي كان ماهو تخاريف=يا مفسرة حلم السواد وصدفها
اشوف ميقافي بعال المشاريف=من عصر لين الشمس كفت طرفها
ادرج نضر عينن تهل الذواريف=على بقايا دار ما الله خلفها
غيّم سماها من كتام العواصيف=واستسرجت نار الدمار بسعفها
قامت تنسفها الصواريخ تنسيف=تنسيف ندافن لفرشن ندفها
باسراب ميراجن سوات الخواطيف=ببطونهن موتن مصفى ارففها
شفت العماير يوم راحت تناتيف=من عالي اسطحها لسافل غرفها
اكبر عماره بالمدينه هكالصيف=صباتها كبر الاضافر شقفها
حلمٍ على ودٍ من العلم به زيف=يابو محمد شمس عمري خسفها
تباً لهل دنياً يكيلون تطفيف=وتباً لنفسٍ عذرها ما عسفها
متقلدٍ شيطانها صارم السيف=اركى عليها ولعن الله جدفها
ماهو غرام بحب حشو النفانيف=حقي من الخفرات حضي قطفها
فاتن ثمان سنين جردٍ مراديف=وضحكات صفران الشدوق نعرفها
ما زعزعني بايهات السواليف=وحلوف كذابٍ بربي حلفها
يوم النجوم المبرهزه مكاسيف=وكلاب مسعى السوق ينضح قرفها
طارن طرالي راوده طاري السيف=اما صلاح الحال والا تلفها
اما به المركب تزفه مجاديف=على اخر الميناء ونركز هدفها
والا تصير حكايتن للمزاهيف=يفرح بها نقال هرجٍ حذفها
يجرها بعصير سوق الهفاهيف=ريحة هواء طبخ الحرام وصلفها
هذا كلامي يابعيد الاطاريف=خذ واردٍ صرف المصارف صرفها
من سلم سوق النقد تبرى المصاريف=صاف الثمين اللي تلاعج صنفها
وعطني من مصيبك ردود المضاريف=دامه ورد جم البحور وغرفها
ما ينتعلى سد روس الشفاشيف=لانهل من عالي روابي شرفها
تم الكلام ولابقي لي تحاسيف=والنفس ماتلحق عليها بأسفها

وهنا رد الشاعر الكبير وأحد أعلام الشعر المعاصرين
شريف بن راكب الفريدي ...

عديت راس اللي لها بالوحش قيف=كم عاد غيري واحدٍ مانصفها
واتعبت رجليّه بكثر التواقيف=وقفت وقفه صاحبي ما وقفها
من هاجسٍ خلاني ارجع وانا معيف=وانسى الضعون اللي ترفرف عطفها
واسباب مابي ياملا دون توصيف=عبرت عزيزٍ من عيونه ذرفها
من قال سم بسم حرش الزواحيف=وراح وتناول فروته والتحفها
عبيد كتفني بالامثال تكتيف=صدّدر بصافيها وخلا عذفها
يا عبيد ما نارك حطبها من الليف=وعلي معصير الهبايب نسفها
وعندي خبر باسباب كل التخاليف=وسير السفينه والهوى اللي جعفها
لكن عسى ماصار رحمه وتخفيف=اصبر على ميلت زمانك وطفها
دام انها مابين نجران وطريف=والسيل دارك سالمه ماجرفها
قدام يوم يقال عندك لها ضيف=وغصبٍ على من كان تاخذ ضيفها
يا عبيد لو دنياك تمشي على الكيف=كلٍ تعرض دربها ثم حرفها
هذا وبين الحلم والعلم والطيف=ابعاد لو دكتورها ماوصفها
يا عبيد خذ رايي وراي المناكيف=كلٍ ذلوله باركه من ضعفها
خل الفقارى اللي تنشد عن الريف=ترى هل البـل منذرين بحوفها
كم واحدٍ ركب المراكب ولاشيف=يخطف بليل وصيدته ما خطفها
وليا انحدر فيه الرشاء للغراريف=حط الملام بلحيته ثم نتفها
اليا شاف له يومٍ كثير التكاليف=يلقاه من شيطان نفسه لقفها
يا عبيد ما ودي يقولون يا حيف=دارٍ بها ماترفع الراس عفها
دام ان صفحاتك قمر وسط الارشيف=تكفى عليهن صورة الشمس ضفها
وساير زمانك لو على مد وانصيف=لو تطرد الوجبه ولو تستلفها
وحظك معك لوكنت بالجو لجنيف=حكمه لنا الله في كتابه كشفها
وكم واحدٍ حقه من المال توليف=ركب القطار وخبزته ما شلفها
اللي على بابه عن المد تغليف=وكّل على يده البعيد وكتفها
الله ينظف دار الاجواد تنظيف=من عالمٍ شيطانها في حففها
من راح حطو فوق راسه غطاريف=ومن شد حاجه تلها ثم لهفها
وتباً لدنياً برقها له رفاريف=من فوق صيرانٍ تشح بحجفها
وتباً لرجلٍ مايعرف المعاريف=نفسه على درب الوفاء ما كلفها
طال الكلام وبلغت الهرج تقطيف=واسمح بلفاتٍ عميلك شطفها
ان كان بالمعنى تناقض وتحريف=وحرفتها قدام تجي محرفها

صح لسان الشاعر الكبير شريف بن راكب وبو سلطان كفو يستاهل بيض وجهك يابويارا على الاضافه تقبل تحياتي